Elorda ákimi taǵy da úlestik qurylys nysandarynyń qurylys alańdaryn tekserip, olardyń úleskerlerimen áńgimelesti, dep habarlaidy "Ult aqparat" elorda ákimdiginiń baspasóz qyzmetine silteme jasap.
Baspasóz málimetterine qaraǵanda, Altai Kólginov «Jaǵalaý-3» TK (A-J bloktary), Syǵanaq kóshesi, Qorǵaljyn tas jolynyń ońtústigine qarai ornalasqan «Jaǵalaý-4» TK qurylysy ornynda boldy.
Sondai-aq ol Turan dańǵylynyń batysyna qarai Syǵanaq kóshesi (jobalanatyn) boiynda salynyp jatqan «Shyǵys» TK máselelerimen tanysty. Bul turǵyn úilerde 1500-den astam úlesker óz páterlerin kútýde.
Kezdesý barysynda olar qurylystyń sozylýyna qatysty narazylyqtaryn bildirdi. Úleskerlermen áńgimelese kele, ákim óz tarapynan ákimdik nysandardy tapsyrýdyń bekitilgen merzimi oryndalýy úshin barlyq sharalardy qoldanatynyn atap ótti. Sonymen qatar, ol qurylys salýshylar óz qarajatyn úilerge salǵan adamdardyń senimin aqtamaǵanyn, olar uzaq jyldar boiy qurylysy aiaqtalmaǵan, sondai-aq kóptegen kemshilikter bar ekenin atap ótti.
«Qurylysty salýshylar úleskerlerdiń aqshasyn paidalana otyryp, úi salý mindetin óz moinyna aldy, biraq adamdardyń senimin aqtamady. Mundai teris piǵyldy adamdarmen aldaǵy ýaqytta jumys istemeitin bolamyz. Endi atalmysh máseleni óz kúshimizben jetkizemiz. Eń bastysy qurylys jumystaryn júrgizý úshin memleket qarajaty bólindi. Qurylysty aiaqtaý jáne úleskerlerdiń uzaqqa sozylǵan máselelerin túpkilikti sheshý protsesin baqylaýda ustaimyz», - dedi ákim.
