Elordanyń LRT jobasy tolyq aiaqtalady. Bul týraly búgin Ortalyq kommýnikatsiialar qyzmetindegi baspasóz máslihatynda Nur-Sultan qalasynyń ákimi Altai Kólginov aitty, dep habarlaidy "Ult aqparat".
«Prezident tapsyrmasyna sáikes, LRT qurylysy jobasyn aitarlyqtai ońtailandyrdyq. Ózderińizde bilesizder, syn kóp boldy. Bastapqyda Qytaidyń kommertsiialyq bankinen 20 jylǵa nesie alynǵan. Osy ýaqyttyń ishinde artyq tólem 800 mln dollar bolar edi. Biz odan bas tarttyq jáne ishki zaimǵa aýystyq», - dedi qala basshysy.
Onyń atap ótýinshe, qabyldanǵan sharalardyń nátijesinde shyǵyndardy únemdeý shamamen 1,2 mlrd dollardy quraidy. Onyń ishinde: nesiege qyzmet kórsetý boiynsha únemdeý 800 million dollardan asady, qurylys-montaj jumystaryna únemdeý 350 million dollar bolady.
«Qazir jospardan 7 stansaǵa kem. Bul da qarajatty únemdeýge múmkindik berdi. Jyljymaly quramǵa qatysty aitar bolsam, bastapqyda jobada qozǵalys aralyǵy 3 minýt bolýy tiis edi. Biz turǵyndar sanyn jáne júktemeniń qandai bolatyndyǵyn eskerdik. Mamandarmen eseptep, bastapqy kezeńde 10 minýt jetkilikti dep sheshtik. Odan keiin jiirek bola bastaidy. Jer asty ótkelderdiń de sanyn qysqartyp, nátijesinde 350 mln teńge qarajat únemdedik. Jalpy únem kólemi shamamen 1,2 mlrd dollardy quraidy. Kórip otyrǵandaryńyzdai, joba birshama arzandady. Tolyqtai alǵanda LRT-ny salyp bitirý mindeti tur. Sebebi kóptegen dúnie jasalyp, infraqurylym tartylyp qoiylǵan», - dedi Altai Kólginov.
