Nur-Sultannyń ákimi Altai Kólginov kópbalaly analardy Eńbek jáne halyqty áleýmettik qorǵaý ministrliginiń dálizinde qabyldaýǵa májbúr boldy, dep habarlaidy Sputnik Qazaqstan.
Ministrlik ǵimaratynda ákimmen kezdespekshi bolǵan analardy ishke birden kirgizgen joq. Kúzet qyzmeti balalarmen kirgize almaimyz dep shyqty. Osydan keiin ákim Altai Kólginov dálizge shyǵyp, árbir ananyń aty-jóni men telefon nómirin jazyp alýǵa kiristi. Al birneshe adamdy jazyp alǵannan keiin barlyǵyn májilis zalyna kirgizýge buiyrdy.
Kúzet qyzmeti ákimge baǵynbasa da, onyń aitqanyn oryndap, kezdesýge kelgen barlyq anany tekserissiz ótkizdi.
Májilis zalda ákim kópbalaly analardyń jeke málimetterin jazyp alýdy jalǵastyrdy. Osydan keiin jýrnalisterge suqbat berdi. BAQ ókilderi aldymen "Kópbalaly analarmen kezdesýge dalaǵa nege shyqpadyńyz?" dep surady.
"Másele kóshede sheshilmeidi. Biz qazir ministrlikpen birge árbir anaǵa qatysty áleýmettik karta jasap jatyrmyz. Bul jerde negizgi másele – turǵyn úi. Oǵan qatysty tiisti baǵdarlama bar. 2 protsenttik baǵdarlama osy shilde aiynda bastalady. Odan keiingi másele – balabaqsha. Sosyn jumysqa ornalasý máselesi de bar. Árbir otbasynyń óz qiyndyǵy bar. Memleket tarapynan da tiisti qoldaý sharalary atqarylyp jatyr", - dedi Kólginov.
Ákimniń aitýynsha, kópbalaly analardyń biraz máselesi bar. Osyǵan bailanysty ákimdikte kópbalaly analardy kúnde qabyldap otyrady. Buǵan deiin birneshe ret kezdesý de ótken.
"Men osy úsh jumadan beri ár apta saiyn kezdesip turamyn. Biraq myna kisilerdiń ishinde kelmegender bar, kelgender de bar. Men ózim 200-ge jýyq anamen kezdesip qoidym. Myna kisiler – jańa kisiler. Sondyqtan qurmetti analardan suraitynymyz, tártippen, mádenietpen ákimshilikke kelip, árbir adamnyń máselesin jeke-jeke qaraiyq. Al kóshege shyǵyp, balalarǵa qandai tárbie beremiz? Qazaq anasynyń róli qaida? Sosyn senim bolýy kerek. Biz aittyq pa, jasaityn nárseni jasaimyz. Qoldan kelmese, ony da túsindiremiz", - dedi Kólginov.
Ákimniń sózine qaraǵanda, kópbalaly analardyń chattarynda arandatatyndar bar.
"Ózderiniń vatsap chattarynda bireýler olarmen oinap otyr. SMS jiberip qoiady da, syrtynan kúlip otyrady. Al analar soǵan senip, júgirip keledi. Bundai tártippen jumys isteýge bolmaidy. Ótken joly osy jerde bes saǵat otyrdyq. Bárin túsindirdik. Odan keiin taǵy bir top ana keldi. Men qazir dúisenbi, seisenbi, sársenbi men beisenbini belgiledim, jumystan keiin jetige qarai bárin qabyldaimyn. Al kúndiz jumys isteý kerek", - deidi Kólginov.
