Elorda ákimi Altai Kólginov Qaraótkel (Ilinka) kentinde ornalasqan Ulttyq ulannyń áskeri bólimine bardy, dep habarlaidy QazAqparat ákimdikke silteme jasap.
Áskeri bólim aýmaǵynda áskeri qyzmetshilerdiń otbasylaryna arnalǵan 104 páterlik turǵyn úi salynǵan. Munda jalpy 350-den astam adam turady. Qalashyqtyń aýmaǵy 20 gektardy quraidy.
Kezdesý barysynda turǵyndar kóshe jaryqtary, dárihanalar men jaiaý júrginshiler ótpeleri joqtyǵyn, sondai-aq qoǵamdyq kólikpen problemalar baryn jetkizdi.
Budan bólek, kóptegen otbasynda balalar ósip keledi. Al mektepte oryn jetkiliksiz.
«Kelesi jylǵa josparlaý úshin jobalyq-smetalyq qujattamany daiyndaý qajet. Aitqan usynystaryńyz eskeriletin bolady. Máselelerdi jan-jaqty zertteimiz», - dedi A. Kólginov.
Áskeri bólimniń aýmaǵynda úsh kazarma, shtab ǵimaraty, kúres jáne jattyǵý zaldary bar eki qabatty sport kesheni, eki ashana, oiyn-sporttyq alańdar, mýltimediialyq atý tiri ornalasqan. Sondai-aq lazaret, kinologiialyq qalashyq jáne mádeni-saýyq ortalyǵy bar.
