QR Qarjy ministri Erulan Jamaýbaev «kóleńkeli» ekonomika deńgeiin tómendetý jumystary jaiynda baiandady, dep habarlaidy QazAqparat.
«Biýdjet protsesiniń ashyqtyǵyn qamtamasyz etý maqsatynda halyqaralyq áriptestermen jumystar júrgizilýde. 2019 jyldyń qorytyndysy boiynsha Qazaqstanǵa
58 ball berildi. Biz álemniń 117 eliniń arasynda 37-oryndamyz. Bul, eń aldymen, ministrlik saityn keńeitý jáne paidalanýshylar úshin jaǵdaidy jaqsartý arqasynda múmkin boldy. Saitta aqparattar, esepter, taldaý, biýdjet boiynsha sholýlar ornalastyrylady. 2021 jyldyń qorytyndysy boiynsha biýdjettiń ashyqtyǵy indeksinde biz keminde 59 ball jinaýdy josparlap otyrmyz», - dedi E. Jamaýbaev Qarjy ministrliginiń alqa májilisinde.
Sonymen qatar ol salyqtyq-kedendik ákimshilendirýdi tsifrlandyrý jáne «kóleńkeli» ekonomika deńgeiin tómendetý baǵytyna toqtaldy.
«Bizdiń basym mindetimiz - kóleńkeli ekonomikany Ekonomikalyq yntymaqtastyq jáne damý uiymy elderiniń deńgeiine deiin tómendetý. Oǵan qarsy is-qimyl jónindegi 2019-2021 jyldarǵa arnalǵan jospar aiasynda qabyldanǵan sharalar onyń deńgeiin jalpy ishki ónimge 23,6 paiyzǵa deiin tómendetýge múmkindik berdi. Qazir ekonomikanyń barlyq salalary men júieleri boiynsha jospardy jańartý boiynsha jumys júrgizilip jatyr», - dedi E. Jamaýbaev.
Onyń aitýynsha, biýdjetti turaqty kiris kózderimen qamtamasyz etý jónindegi mindetti sheshýdi ministrlik salyqtyq-kedendik ákimshilendirýdi odan ári tsifrlandyrý esebinen iske asyryp keledi.
«Tek sońǵy 3 jyldyń ózinde joǵaryda atalǵan sharalar biýdjetke 2 trillion teńgeden astam, onyń ishinde 2020 jyly 710 mlrd teńge qosymsha túsimdi qamtamasyz etýge múmkindik berdi. Ózderińiz biletindei, «kóleńkeli» ekonomika kólemin qysqartý úshin 2021 jylǵy 1 qańtardan bastap jalpyǵa birdei deklaratsiialaýdyń birinshi kezeńi engizildi. Osyǵan bailanysty keń aýqymdy túsindirý jumystaryn júrgizý josparlanyp otyr», - dedi vedomstvo basshysy.
