Kóleńkeli ekonomika negizinen saýda salasynda. Bul týraly Ortalyq kommýnikatsiialar qyzmetinde «Atameken» UKP basqarma tóraǵasy Abylai Myrzahmetov málim etti, dep habarlaidy QazAqparat.
Baspasóz máslihatynda elimizde biznestiń damýyna qatysty suraq qoiyldy.
«Qazir barlyq kásipkerlerdiń ahýaly koronavirýs indetine bailanysty bolyp otyr. Árine, moratorii (tekserýge qatysty) jariialanǵany óte oryndy boldy. Óitkeni, kásipkerlerdiń kóbisi qazirgi jaǵdaida salyq túgili eńbekaqy tólei almai, kásipkerligin júrgize almaityn jaǵdaiǵa tap boldy. Ásirese, qyzmet kórsetý salasynda baiqalady. Keshe ǵana statistkany qarap shyqtym, kinoteatrlar men kinoparkter ótken jylǵa qaraǵanda 50 paiyz shamasynda tómendep otyr. Sonymen qatar, saýda ortalyqtaryndaǵy attraktsiondar boiynsha osyndai jaǵdai, iaǵni tabystary tómendedi», - dedi A. Myrzahmetov.
Osy oraida ol salyqtan bosatý jáne tekserýge moratorii sharalary koronavirýs indetinen kelgen ahýaldy jeńildetýge yqpal etkenin jetkizdi.
Munymen qosa basqarma tóraǵasy «kóleńkeli biznes» máselesine toqtaldy.
«Ártúrli saraptaýlar jariialandy, orta eseppen 20-30 paiyz kóleńkeli ekonomika dep aitýǵa bolady. Bunyń barlyǵy negizinen saýda salasyna tiesili. Olar 10-15 jyl boiy tirkeýde bolmaǵan. Kóleńkeli ekonomikanyń barlyq sebepteri belgili, sondyqtan Úkimet tarapynan onymen kúreste úlken jospar bar», - dedi Abylai Myrzahmetov.
«Kóleńkeli naryqta «bazar ekonomikasy» qamtylǵan. Bir jaǵynan tutynýshyǵa bazardaǵy taýardyń quny arzan siiaqty kórinedi. Salyq tólenbegennen keiin taýardyń quny arzan bolatyny túsinikti. Al túpten kelgende, Úkimetke de, tutynýshyǵa da úlken ziianyn tigizedi. Sebebi bul taýarlar sertifikattan ótpeidi, iaǵni sapasyna qatysty kúmán bar», - dedi ol.
