Foto: primeminister.kz
Premer-Ministr Álihan Smaiylovtyń tóraǵalyǵymen ótken Úkimet otyrysynda kún tártibinen tys Qazaqstannyń batys óńirlerinde bolǵan tótenshe jaǵdaidyń saldaryn joiý máselesi qaraldy, dep habarlaidy "Ult aqparat" primeminister.kz saityna silteme jasap.
«QazMunaiGaz» UK» AQ basqarma tóraǵasynyń orynbasary Dáýletjan Hasanovtyń baiandaýynsha, keshe tús aýa syrtqy jelilerde elektr energiiasyn berýdiń toqtaýyna bailanysty Atyraý MÓZ-niń jumysy toqtap qalǵan.
«Elektrdiń óshýi nátijesinde AMÓZ-diń barlyq tehnologiialyq qondyrǵysy qaýipsiz toqtatyldy. Apattyq jaǵdaidyń aldyn alý jáne qyzmetkerlerdiń qaýipsizdigin qamtamasyz etý úshin apattardy joiý algoritmine sáikes barlyq qondyrǵydan kómirsýtek gazy alaýǵa qarai jiberildi», — dedi Dáýletjan Hasanov.
Onyń aitýynsha, túnde elektr energiiasy qaita iske qosylǵannan keiin zaýyt qolda bar qorlardan munai ónimderin jónelte bastady. Búgingi tańda AMÓZ rezervýarlarynda 26 myń tonna avtobenzin, 33 myń tonna dizel otyny, 1 200 tonna suiytylǵan munai gazy bar.
Jalpy el boiynsha AI-92 benzini men dizel otynynyń qorlary bir aiǵa, AI-95 eki aptaǵa jetedi.
«Pavlodar munai-himiia zaýyty 20 shildege deiin jospar boiynsha jóndeýge toqtatylǵanyn, al Shymkent MÓZ-i katalitikalyq riforming qondyrǵysyndaǵy jumystar úshin ishinara toqtatylǵanyn eskersek te, zaýyttardan munai ónimderin jóneltý toqtaǵan joq. Syrtqy jelilerde elektr energiiasyn berý bastalǵannan keiin AMÓZ tehnologiialyq qondyrǵylaryn turaqty rejimge shyǵarý bastaldy. Apta sońyna deiin zaýyt munai ónimderin óndirýdiń burynǵy kólemine shyǵýdy josparlap otyr», — dedi Dáýletjan Hasanov.
Sondai-aq qabyldanǵan sharalar týraly KEGOC kompaniiasynyń basqarma tóraǵasy Qanysh Moldabaev, Mańǵystaý oblysynyń ákimi Nurlan Noǵaev jáne Atyraý oblysynyń ákimi Serik Shápkenov baiandama jasady.
Premer-Ministrdiń aitýynsha, qazirgi tańda energiiamen qamtamasyz etý qalpyna keltirilip jatyr. AMÓZ-de tehnologiialyq aqaýlar anyqtalǵan joq. Zaýyttyń jumysyn qaýipsiz toqtatý úshin der kezinde sharalar qabyldandy. Qazirgi ýaqytta zaýyt basqa kásiporyndar siiaqty óz jumysyn qalpyna keltirýde.
«Eshqandai da janar-jaǵarmai tapshylyǵy bolmaitynyn basa atap ótkim keledi. Qolda bar otyn qory búkil respýblikaǵa jetedi. Barlyq munai óńdeý zaýytyn toqtatý týraly alyp-qashpa áńgimeler shyndyqqa janaspaidy. Jaǵdai baqylaýda», — dedi Álihan Smaiylov.
Úkimet basshysy Memleket basshysynyń tapsyrmasyna sáikes apattyń sebepterin tekserý úshin arnaiy Memlekettik komissiia qurylǵanyn aityp ótti. Onyń jumysyna Premer-Ministr basshylyq etedi.
«Kináliler jaýapqa tartylady. Qazirgi tańda eń bastysy – barlyq kásiporynnyń jumysyn qalpyna keltirip, tutynýshylardy elektr energiiasymen tolyǵymen qamtamasyz etý», — dedi Álihan Smaiylov.
Oǵan qosa Premer-Ministr Mańǵystaý oblysynyń ákimdigine energetikalyq kombinattyń qoldanystaǵy jabdyqtaryn iske qosý jáne jańǵyrtý boiynsha sharalar qabyldaýdy, Energetika ministrligine «KEGOC» kompaniiasymen birlesip, Batys energetikalyq torabynyń qalypty jumysyn qamtamasyz etýdi, Energetika ministrligine IIM jáne BQA-men birge alyp-satý jáne janar-jaǵarmaidyń jasandy tapshylyǵyn týǵyzý faktilerine tosqaýyl qoiýdy tapsyrdy.
