Tanymal ánshi ári aktrisa Aigúl Imanbaeva otbasyndaǵy áieldiń talapshyldyǵy men er adamnyń tabysy arasynda bailanys bar ekenin aityp, kópshiliktiń talqysyna tústi. Óner iesiniń pikirin biri qoldasa, endi biri mundai kózqaraspen kelispeitinin bildirdi, dep habarlaidy ult.kz.
Aigúl Imanbaeva óziniń Instagram paraqshasynda áiel adamnyń kúieýine degen qarym-qatynasy onyń tabys tabýǵa degen yntasyna áser etýi múmkin ekenin aitty.
Ánshiniń sózinshe, keibir áielder jubaiyna salmaq salmaýdy oilap, óz qalaýyn keiinge ysyryp qoiady. Tipti kúieýi syilyq ákelse de, oǵan aqsha jumsaǵanyn artyq kórip, otbasynyń basqa qajettilikterin alǵa tartady.
«Kúieýin aiap, eshqandai talap qoimai, ákelgen bir tal gúline riza bolyp, "Ony nege aldyń? Odan da azyq-túlik almadyń ba? Ózińe jumsamadyń ba?" dep jaqsy kórinip, jaqsy atanyp otyratyn qyzdardyń, kelinshekterdiń kúieýleri týra sondai ǵana mólsherde tiyn-teben tabady», – dedi ol.
Al óz qalaýyn jasyrmai, kúieýinen qalaǵan dúniesin suraityn áielderdiń jubailary kóbirek tabys tabýǵa umtylady dep esepteidi. Óner iesi mundai jaǵdailardy ómirde jii baiqaitynyn aityp, talapshyl áiel er adamnyń alǵa umtylýyna túrtki bolýy múmkin degen oiyn jetkizdi.
«Al eger kelinshegi talapshyl bolsa, orystar "sterva" dep aitady ǵoi, kúieýinen "Men myna nárseni alǵym keledi, mynany kigim keledi, myna jerge barǵym keledi, maǵan osynsha aqsha kerek" dep talap etetin bolsa, dál sondai kelinshekterdiń kúieýleri óte tabysty bolady jáne kóp aqsha tabady eken. Shynymen de, men ony ózim baiqaimyn», – dedi ánshi.
Aigúl Imanbaeva qazaq áielderiniń arasynda kúieýine materialdyq talap qoiýdy yńǵaisyz kóretinder bar ekenin de sóz etti. Onyń aitýynsha, keibir kelinshekter jubaiy ózin dúnieqońyz dep oilap qalmasyn degen nietpen óz qajettiligin aitýdan tartynady.
Ánshi áiel adam únemi ózin shektep, barlyǵyna kóndige bermeýi kerek degen pikirde. Ol qymbat syilyq alǵysy keletinin nemese saiahatqa shyqqysy keletinin ashyq jetkizýdiń esh ábestigi joq dep sanaidy.
«Kerisinshe, "Men mynany alǵym keledi, brilliant taqqym keledi, bir jaqqa qydyrǵym keledi, áper" dep surap, talap etip otyratyn bolsa, er azamattyń energiiasy kóterilip, sonshalyqty tabys tabady eken. Kúshti insait bolsyn dep aityp otyrmyn», – dedi óner iesi.
«Talap qoiǵannan aqsha kóbeiip ketpeidi»: jeli qoldanýshylary ne deidi?
Ánshiniń bul sózi áleýmettik jelide qyzý pikirtalas týdyrdy. Birqatar oqyrman áieldiń óz qalaýyn ashyq aitýy durys ekenin qoldasa, ózgeleri er adamnyń tabysyn áieliniń talabymen bailanystyrýǵa bolmaitynyn alǵa tartty.
Qarsy pikir bildirgenderdiń aitýynsha, adamnyń qansha tabys tabatyny onyń eńbegine, kásibine, múmkindigi men jaýapkershiligine bailanysty. Sondyqtan jubaiynan qymbat syilyq talap etý onyń qarjylyq jaǵdaiyn birden jaqsartpaidy. Keibir jeli qoldanýshylary qansha talap qoisa da, ózgergisi kelmeitin adam ózgermeitinin aityp, ánshiniń tujyrymymen kelispegen.
Al Aigúl Imanbaevanyń sózin quptaǵandar áieldiń óz qajettiligin jasyryp, únemi kúieýiniń jaǵdaiyn ǵana oilaýy durys emes dep esepteidi. Olardyń pikirinshe, erli-zaiyptylardyń bir-birinen ne kútetinin ashyq aitýy otbasyndaǵy túsinistikti arttyrýy múmkin.
Degenmen keibir oqyrman shamadan tys talap qoiý erli-zaiyptylar arasyndaǵy kelispeýshilikke ulasýy múmkin ekenin eskertken.
Osylaisha ánshiniń bir aýyz pikiri qoǵamda áieldiń otbasyndaǵy orny, er adamnyń jaýapkershiligi jáne qarjylyq máseleler týraly talqylaýǵa ulasty.
Aigúl Imanbaeva kim?
Aigúl Serikqulqyzy Imanbaeva – qazaqstandyq tanymal ánshi, aktrisa, telejúrgizýshi ári prodiýser, Qazaqstannyń eńbek sińirgen qairatkeri. Ol 1977 jyly 15 naýryzda Jambyl oblysy Qordai aýdanyndaǵy Kenen aýylynda dúniege kelgen. Bala kezinen ónerge jaqyn bolyp, mektep qabyrǵasynda júrgende baian aspabyn meńgergen. 1994 jyly Temirbek Júrgenov atyndaǵy Qazaq ulttyq óner akademiiasyna oqýǵa túsip, 1998 jyly támamdaǵan.
Eńbek jolyn Júsipbek Elebekov atyndaǵy estradalyq-tsirk kolledjinde oqytýshy bolyp bastaǵan. Keiin Ǵabit Músirepov atyndaǵy Qazaq memlekettik akademiialyq balalar men jasóspirimder teatrynda aktrisa retinde eńbek etti. Teatr sahnasynda "Qyz Jibek", "Alma baǵy", "Jeltoqsan jeli" jáne basqa da qoiylymdarda túrli keiipkerlerdi somdady. 2001 jyly "Habar" telearnasyndaǵy "Uiat bolmasyn" baǵdarlamasy arqyly kópshilikke keńinen tanyldy. Ánshilik jolynda da tabysqa jetip, 2004 jyly halyqaralyq "Aziia daýysy" baiqaýynyń "Qazaq ánderi" atalymy boiynsha bas júldege ie boldy.
2006 jyly ónerdegi jetistikteri úshin "Daryn" memlekettik jastar syilyǵymen marapattaldy. Sol jyly "Tańǵy eles" atty alǵashqy jeke esep berý kontsertin ótkizdi. 2011 jyly óziniń "A.I." drama teatryn ashyp, shyǵarmashylyq jumysyn jańa baǵytta jalǵastyrdy. 2015 jyly oǵan "Qazaqstannyń eńbek sińirgen qairatkeri" qurmetti ataǵy berildi. Óner iesi teatr men estradadan bólek, kino salasynda da eńbek etip, birneshe filmge túsken. Búginde Aigúl Imanbaeva ánshilik, akterlik jáne prodiýserlik qyzmetimen qatar, áleýmettik jelidegi pikirleri arqyly da kópshiliktiń nazarynda júr.
