Almatydaǵy "Kókjiek" yqshamaýdanynda kópqabatty úi órtendi. Órtengen 31-shi jáne 32-shi úidegi páter ieleri Tengrinews.kz tilshisine qansha zalal kelgenin aityp, órtten keiingi jaǵdaidy kórsetti. Negizinen eki úidiń de altynshy qabatynda ornalasqan páterlerge qatty zalal kelgen. Birinshi men besinshi qabatta ornalasqan páterlerdiń balkonyn órt sharpyp, ystyń iisi qalǵan.
31-úidegi 48-páterdiń iesi kiimnen basqa úiden alyp shyǵatyn eshteńe qalmaǵanyn aitady.
"Úide otbasymyzben shái iship otyrǵanbyz. Syrtta oinap júrgen qyzym domofonǵa qońyraý shalyp, ekinshi qabattan tútin shyǵyp jatqanyn aitty. Ortańǵy qabatta bolyp jatyr degennen keiin alapat órt bolatynyn bilgen joqpyz. Dalaǵa shyqtyq, órt sóndirý qyzmetine habarlap qoiǵan eken. Úidiń artqy jaǵyna barǵanymyzda, órt birinshi qabattan joǵarǵy qabatqa kóship jatyr eken. Órt sóndirý qyzmetiniń jumysyna razy emespiz. As bólmesindegi jihaz ben tehnikanyń barlyǵy jaramsyz, tek kiim-keshegimizdi ǵana aldyq", - deidi Áliia.
31-úidiń 27-páterinde turatyn Láilá Túkenovanyń aitýynsha, jalpyǵa birdei taraityn gazdy óshirý arqyly órttiń ýshyǵyp ketýiniń aldyn alǵan.
"Jumysta otyrǵanda atam qońyraý shalyp kórshi úidiń balkony órtenip jatqanyn aitty. Qujattarymnyń barlyǵy jumysta bolatyn. Kórshi úige barǵanda olar jýyný bólmesinen sý alyp órtti ózderi sóndirip jatqan eken. Osy kezde atam gaz ben jaryqty óshirgen. Meniń atam bolmaǵanda myna eki úi joq bolar edi. Jumystan suranyp, úige kelsem, barlyǵy janyp ketken. Eki balam aman-esen. Búgin tańǵy toǵyzda ákimdik ókilderimen páterlerdi aralap shyqtyq, 100 AEK kóleminde kómek kórsetiletinin aitty. Myna úidiń qabyrǵalarymen esik terezesin jóndeýge jihaz tehnikany sanamaǵanda, keminde eki-úsh million teńge ketedi. Dalada qaldyq, qaida bararymyzdy da bilmeimin. Órttiń aldyn ala sebebi, myna kórshi úidiń 7-9 jastaǵy balalary balkonda birdeme jaqqan, sodan taraǵan", - deidi Láilá Túkenova. Onyń sózin taǵy bir kórshisi rastap, órt balalardyń oinynan shyqqan bolýy múmkin degendi aitady.
31-úidiń 6-qabatynadaǵy 46-páterdiń turǵyny Nurtýǵan aǵa áieli men balalaryn týystarynyń úiine jibergenin aitady.
"Syrtta kishkentai balalar "Pojar, pojar" dep aiǵailap júrdi. Balkonǵa shyǵyp qarasam, birinshi qabat órtenip jatyr eken. Syrtqa júgirip shyqtym, órt sóndirýshiler lapyldaǵan órtti sóndirýge asyǵa qoimady", - deidi Nurtýǵan aǵa.
Jetisý aýdanynyń ákimi Muhtar Tájibaev osy jaǵdaiǵa bailanysty pikir bildirdi.
"Turǵyndarǵa óz úilerine kirýine ruqsat berildi. Bul eki úide 96 páter bar, onyń barlyǵy birdei zardap shekken joq. Eki úige tirkelgen adamdar sany - 272 adam. Úide sý men jylý bar. Tehnika qaýipsizdigine bailanysty jaryq pen gaz sóndirilgen. Qansha úidiń zardap shekkenin quzyrly organdardyń saraptamasynan keiin ǵana aitýǵa bolady. Evakýatsiialyq shtab óz jumysyn jalǵastyrady, iaǵni jatyn oryn men tamaqtandyrýdy qamtamasyz etetin bolady", - deidi aýdan ákimi Muhtar Iliiasuly.
31-úidiń 47-páterin jaldap turatyn jas otbasy da kiimderiniń órtenip ketkenin aitady.
"Órt bastalǵanda biz qyzym ekeýimiz uiyqtap jatqanbyz. As bólmesiniń terezesi ashyq turǵan bolatyn, sodan tútin kirip, qyzym qusa basady, meniń de basym ainalyp ketti. Qujattardy alýǵa da murshamyz bolmady. Kireberiske shyqsam kók tútinnen baspaldaqtyń qaida turǵanyn kórý múmkin emes, úide qala bereiin desem lapyldaǵan ottan zárem ketti. Osy aida kóshýimiz kerek bolatyn, sol sebepti kiim-keshektiń barlyǵyn balkonǵa jinap qoiǵanbyz. Túnde týystarymyzdyń úiine qondyq", - deidi Aiman esimdi turǵyn.
Eske sala keteiik, keshe, 5 sáýirde saǵat 16:03-te Jetisý aýdanyndaǵy "Kókjiekte" órt shyqqany habarlanǵan edi. Órt sóndirýshiler oqiǵa ornynan 300 adamdy evakýatsiialady. Órt aýmaǵy - 1180 sharshy metr.
