الماتىداعى "كٶكجيەك" ىقشاماۋدانىندا كٶپقاباتتى ٷي ٶرتەندٸ. ٶرتەنگەن 31-شٸ جەنە 32-شٸ ٷيدەگٸ پەتەر يەلەرٸ Tengrinews.kz تٸلشٸسٸنە قانشا زالال كەلگەنٸن ايتىپ, ٶرتتەن كەيٸنگٸ جاعدايدى كٶرسەتتٸ. نەگٸزٸنەن ەكٸ ٷيدٸڭ دە التىنشى قاباتىندا ورنالاسقان پەتەرلەرگە قاتتى زالال كەلگەن. بٸرٸنشٸ مەن بەسٸنشٸ قاباتتا ورنالاسقان پەتەرلەردٸڭ بالكونىن ٶرت شارپىپ, ىستىڭ يٸسٸ قالعان.
31-ٷيدەگٸ 48-پەتەردٸڭ يەسٸ كيٸمنەن باسقا ٷيدەن الىپ شىعاتىن ەشتەڭە قالماعانىن ايتادى.
"ٷيدە وتباسىمىزبەن شەي ٸشٸپ وتىرعانبىز. سىرتتا ويناپ جٷرگەن قىزىم دوموفونعا قوڭىراۋ شالىپ, ەكٸنشٸ قاباتتان تٷتٸن شىعىپ جاتقانىن ايتتى. ورتاڭعى قاباتتا بولىپ جاتىر دەگەننەن كەيٸن الاپات ٶرت بولاتىنىن بٸلگەن جوقپىز. دالاعا شىقتىق, ٶرت سٶندٸرۋ قىزمەتٸنە حابارلاپ قويعان ەكەن. ٷيدٸڭ ارتقى جاعىنا بارعانىمىزدا, ٶرت بٸرٸنشٸ قاباتتان جوعارعى قاباتقا كٶشٸپ جاتىر ەكەن. ٶرت سٶندٸرۋ قىزمەتٸنٸڭ جۇمىسىنا رازى ەمەسپٸز. اس بٶلمەسٸندەگٸ جيھاز بەن تەحنيكانىڭ بارلىعى جارامسىز, تەك كيٸم-كەشەگٸمٸزدٸ عانا الدىق", - دەيدٸ ەلييا.
31-ٷيدٸڭ 27-پەتەرٸندە تۇراتىن لەيلە تٷكەنوۆانىڭ ايتۋىنشا, جالپىعا بٸردەي تارايتىن گازدى ٶشٸرۋ ارقىلى ٶرتتٸڭ ۋشىعىپ كەتۋٸنٸڭ الدىن العان.
"جۇمىستا وتىرعاندا اتام قوڭىراۋ شالىپ كٶرشٸ ٷيدٸڭ بالكونى ٶرتەنٸپ جاتقانىن ايتتى. قۇجاتتارىمنىڭ بارلىعى جۇمىستا بولاتىن. كٶرشٸ ٷيگە بارعاندا ولار جۋىنۋ بٶلمەسٸنەن سۋ الىپ ٶرتتٸ ٶزدەرٸ سٶندٸرٸپ جاتقان ەكەن. وسى كەزدە اتام گاز بەن جارىقتى ٶشٸرگەن. مەنٸڭ اتام بولماعاندا مىنا ەكٸ ٷي جوق بولار ەدٸ. جۇمىستان سۇرانىپ, ٷيگە كەلسەم, بارلىعى جانىپ كەتكەن. ەكٸ بالام امان-ەسەن. بٷگٸن تاڭعى توعىزدا ەكٸمدٸك ٶكٸلدەرٸمەن پەتەرلەردٸ ارالاپ شىقتىق, 100 اەك كٶلەمٸندە كٶمەك كٶرسەتٸلەتٸنٸن ايتتى. مىنا ٷيدٸڭ قابىرعالارىمەن ەسٸك تەرەزەسٸن جٶندەۋگە جيھاز تەحنيكانى ساناماعاندا, كەمٸندە ەكٸ-ٷش ميلليون تەڭگە كەتەدٸ. دالادا قالدىق, قايدا بارارىمىزدى دا بٸلمەيمٸن. ٶرتتٸڭ الدىن الا سەبەبٸ, مىنا كٶرشٸ ٷيدٸڭ 7-9 جاستاعى بالالارى بالكوندا بٸردەمە جاققان, سودان تاراعان", - دەيدٸ لەيلە تٷكەنوۆا. ونىڭ سٶزٸن تاعى بٸر كٶرشٸسٸ راستاپ, ٶرت بالالاردىڭ وينىنان شىققان بولۋى مٷمكٸن دەگەندٸ ايتادى.
31-ٷيدٸڭ 6-قاباتىناداعى 46-پەتەردٸڭ تۇرعىنى نۇرتۋعان اعا ەيەلٸ مەن بالالارىن تۋىستارىنىڭ ٷيٸنە جٸبەرگەنٸن ايتادى.
"سىرتتا كٸشكەنتاي بالالار "پوجار, پوجار" دەپ ايعايلاپ جٷردٸ. بالكونعا شىعىپ قاراسام, بٸرٸنشٸ قابات ٶرتەنٸپ جاتىر ەكەن. سىرتقا جٷگٸرٸپ شىقتىم, ٶرت سٶندٸرۋشٸلەر لاپىلداعان ٶرتتٸ سٶندٸرۋگە اسىعا قويمادى", - دەيدٸ نۇرتۋعان اعا.
جەتٸسۋ اۋدانىنىڭ ەكٸمٸ مۇحتار تەجٸباەۆ وسى جاعدايعا بايلانىستى پٸكٸر بٸلدٸردٸ.
"تۇرعىندارعا ٶز ٷيلەرٸنە كٸرۋٸنە رۇقسات بەرٸلدٸ. بۇل ەكٸ ٷيدە 96 پەتەر بار, ونىڭ بارلىعى بٸردەي زارداپ شەككەن جوق. ەكٸ ٷيگە تٸركەلگەن ادامدار سانى - 272 ادام. ٷيدە سۋ مەن جىلۋ بار. تەحنيكا قاۋٸپسٸزدٸگٸنە بايلانىستى جارىق پەن گاز سٶندٸرٸلگەن. قانشا ٷيدٸڭ زارداپ شەككەنٸن قۇزىرلى ورگانداردىڭ ساراپتاماسىنان كەيٸن عانا ايتۋعا بولادى. ەۆاكۋاتسييالىق شتاب ٶز جۇمىسىن جالعاستىرادى, ياعني جاتىن ورىن مەن تاماقتاندىرۋدى قامتاماسىز ەتەتٸن بولادى", - دەيدٸ اۋدان ەكٸمٸ مۇحتار ٸليياسۇلى.
31-ٷيدٸڭ 47-پەتەرٸن جالداپ تۇراتىن جاس وتباسى دا كيٸمدەرٸنٸڭ ٶرتەنٸپ كەتكەنٸن ايتادى.
"ٶرت باستالعاندا بٸز قىزىم ەكەۋٸمٸز ۇيىقتاپ جاتقانبىز. اس بٶلمەسٸنٸڭ تەرەزەسٸ اشىق تۇرعان بولاتىن, سودان تٷتٸن كٸرٸپ, قىزىم قۇسا باسادى, مەنٸڭ دە باسىم اينالىپ كەتتٸ. قۇجاتتاردى الۋعا دا مۇرشامىز بولمادى. كٸرەبەرٸسكە شىقسام كٶك تٷتٸننەن باسپالداقتىڭ قايدا تۇرعانىن كٶرۋ مٷمكٸن ەمەس, ٷيدە قالا بەرەيٸن دەسەم لاپىلداعان وتتان زەرەم كەتتٸ. وسى ايدا كٶشۋٸمٸز كەرەك بولاتىن, سول سەبەپتٸ كيٸم-كەشەكتٸڭ بارلىعىن بالكونعا جيناپ قويعانبىز. تٷندە تۋىستارىمىزدىڭ ٷيٸنە قوندىق", - دەيدٸ ايمان ەسٸمدٸ تۇرعىن.
ەسكە سالا كەتەيٸك, كەشە, 5 سەۋٸردە ساعات 16:03-تە جەتٸسۋ اۋدانىنداعى "كٶكجيەكتە" ٶرت شىققانى حابارلانعان ەدٸ. ٶرت سٶندٸرۋشٸلەر وقيعا ورنىنان 300 ادامدى ەۆاكۋاتسييالادى. ٶرت اۋماعى - 1180 شارشى مەتر.
