Parlament Májilisinde qaralyp jatqan erekshe qorǵalatyn tabiǵi aýmaqtar máselelerine qatysty zań jobasy arqyly 1,5 myń ga aýmaqty erekshe qorǵalatyn tabiǵi aýmaq mártebesine qaitarý kózdelip otyr, dep habarlaidy QazAqparat.
«Sizdiń ministrlikterińizdiń aqparatyna sensek Býrabai memlekettik, ulttyq tabiǵi parkiniń 370 ga aýmaǵy Býrabai AEA qajettigine bólingen. 2014 jyly Kókjailaý taý-shańǵyly kýrortyn salý úshin Ile-Alataý ulttyq tabiǵi parkiniń myń gektarǵa jýyq bóligi qarastyrylǵan. Búginge deiin ol jerde podstantsiia salyndy. Osyǵan bailanysty atalǵan aýmaqtyń bári de erekshe qorǵalatyn tabiǵi aýmaq sanatyna qaitaryla ma?» - dep surady Májilistiń jalpy otyrysynda depýtat Ivan Klimenko.
Májilismenniń suraǵyna Ekologiia, geologiia jáne tabiǵi resýrstar vitse-ministri Erlan Nysanbaev jaýap berdi.
«Ózderińiz biletindei Shýche-Býrabai kýrorttyq aýmaǵyn damytý úshin 370 ga aýmaqty bóldik. Búgingi tańda onyń 260 ga bóligi igerildi. Endigi 110 ga bóligin búgingi kúni erekshe qorǵalatyn tabiǵi aýmaq quramyna qaitarýdy kózdep otyrmyz. Kókjailaý boiynsha taý-shańǵyly keshendi salýǵa jer bólgenbiz. Alaida bul jobadan qazir bas tartý týraly sheshim qabyldandy. Sol sebepti búgingi tańda qala ákimdigi bul jer aýmaqtaryn qaitarýǵa kelisip otyr. Osyǵan orai zań arqyly jeńildetilgen tártippen eshqandai shyǵynsyz ony qaitarýdy kózdeimiz. Parkterdiń aýmaǵyna eshqandai ózgerister engizilmeidi», - dedi Erlan Nysanbaev.
