Ile Alataýy Ulttyq parki aýmaǵyndaǵy 5 jer ýchaskesi jalǵa berý úshin tenderge qoiyldy, dep habarlaidy QazAqparat tilshisi.
Keshe tenderlik komissiia konvertti ashty. Endi tenderlik komissiia 15 kún ishinde bul qujattardy qarap, jer ýchaskelerin qysqa jáne uzaq merzimge jalǵa berý týraly sheshim shyǵarady. Qazaqstan zańnamasyna sáikes jerdi eń azy - 5 jylǵa, eń kóbi 49 jylǵa jalǵa berýge bolady. Tender qujattamasynda kórsetilgendei, bul jerde áńgime 49 jylǵa jalǵa berý týraly bolyp otyr.
«Qazaqstanda erekshe qorǵalatyn tabiǵi aýmaqtardy qorǵaý týraly zańnyń 46-babynyń 3-tarmaǵyna sáikes týristik jáne rekreatsiialyq qyzmetterdi júzege asyrý memlekettik tabiǵi parkiniń infraqurylymyn damytý týraly bas josparyna sáikes oryndalady. Ulttyq parktiń bas jospary 2019 jyldyń 3 qańtarynda ýákiletti organ - QR Aýylsharýashylyǵy ministrligi, Orman sharýashylyǵy janýarlar dúniesi komitetiniń №17-5-6/1 buiryǵymen bekitildi. Bas jospar negizinde jer ýchaskelerin qysqa jáne uzaq merzimge jalǵa berý oram, telim boiynsha kórsetiledi. Bolashaqta osy jerlerdi qysqa jáne uzaq merzimge jalǵa berýge bolady dep bekitilgen. Bas josparda týrizmdi damytý maqsatynda 126 ýchaskeni - uzaq merzimge, 66 ýchaskeni qysqa merzimge jalǵa berý josparlanǵan. Bizdiń park ýákiletti organǵa tender ótkizýge ruqsat berý týraly hat jazdy. 2019 jyly 26 aqpanda ýákiletti organ osy ýchaskelerge tender ótkizý týraly ruqsat berdi. Bir ai buryn park basshylyǵy basylym betterinde tender týraly resmi túrde jariialady», - dedi Ile Alataýy Ulttyq parki direktorynyń orynbasary Darhan Isabekov.
Parktiń bas direktorynyń buiryǵymen Kókjailaý jobasyna sáikes 134,4 ga jer boiynsha 4 lotqa komissiia júrgizildi. Tenderge tek bir ǵana zańdy tulǵa - qalalyq týrizm basqarmasy ǵana qatysty. Birinshi kezeńde tenderlik komissiia tender qujattarynyń zańdylyǵyn tekserdi.
Tender nátijesi 15 kúnnen soń belgili bolady. Komissiia óziniń qorytyndysyn shyǵarady. Tender sátti ótken soń da qurylys birden bastalmaidy.
«Bir jyldan soń ǵana jobalyq-smetalyq qujattama jasalady. Sosyn baryp ol ýákiletti organnan ótedi. Bul qujattar Sáýlet basqarmasynan, ekologiialyq, memlekettik saraptamadan ótedi. Biz ulttyq park ýákiletti organmen birige otyryp, ruqsat beremiz. Olar 3 jyl ishinde nysandy salyp bitýi kerek», - dedi Darhan Isabekov.
Onyń aitýynsha, qazir parktiń týristik potentsialyn arttyrýǵa kómek qajet. Parktiń damýyna memleket eshqandai qarajat bólmeidi. Al salynatyn nysannan tabiǵatqa kóp nuqsan kelmeidi.
«Eger ol jerde Qyzyl kitap ósimdikteri ósetin bolsa, resýrstyq tekserý júrgiziledi. Bári zańǵa sai jasalady. Ondai aǵashty kesý úshin de úkimet qaýlysy kerek. Qaýly shyqqan soń ǵana aǵashty kese alady. Jobanyń arqasynda Kókjailaýǵa kiretin jol jasalady. Munyń aldynda 6 metrge keńeitiledi degen edi. Endi olai emes, tek shuńqyrlary jóndeledi», - dedi D.Isabekov.
