Kókjailaýǵa erekshe qorǵalatyn tabiǵi aýmaq mártebesin qaitarýdy qarai otyryp, Májilis depýtattary onda turǵyzylǵan elektropodstantsiianyń ne bolatynyna qatysty másele kóterdi, dep habarlaidy QazAqparat.
«Kókjailaýǵa erekshe qorǵalatyn tabiǵi aýmaq mártebesi qaitarylǵannan keiin ol jerde turǵyzylǵan nysan ne bolady», - dep surady Májilistiń jalpy otyrysynda depýtat Ivan Klimenko.
Bul máselege qatysty Májilis tóraǵasy Nurlan Nyǵmatýlin de pikirin bildirdi.
«Erekshe qorǵalatyn tabiǵi aýmaq mártebesi qaitarylǵannan keiin ol jerdegi buryn salynyp qoiǵan qurylystyń ne bolatyny týraly másele kóterilip jatyr. Zań jobasy erekshe qorǵalatyn tabiǵi aýmaq mártebesin naqty aiqyndaityny belgili – iaǵni ol jerde azamattyq ta, ónerkásiptik te maqsatta qurylys júrgizilmeýi kerek», - dedi ol.
Qoiylǵan suraqqa Ekologiia, geologiia jáne tabiǵi resýrstar vitse-ministri Erlan Nysanbaev jaýap berdi.
«Jer aýmaǵyn qaitarmas buryn salynǵan qurylys boiynsha komissiia uiymdastyrylǵan edi. Ol podstantsiia boiynsha sheshim qabyldandy. Podstantsiiaǵa demontaj júrgizilip, qala qaraýyna beriledi. Bul nysan Kókjailaý taý-shańǵyly kesheni aiasynda kádege jaraýy kerek bolatyn. Sol sebepti joba iske aspaityn bolǵandyqtan onyń endigi kezekte qajeti joq», - dedi Erlan Nysanbaev. Aita keteiik, Parlament Májilisinde erekshe qorǵalatyn tabiǵi aýmaqtar máselelerine qatysty zań jobasy talqylanǵan bolatyn.
Áitse de vitse-ministrdiń bul jaýaby Májilis Tóraǵasyn qanaǵattandyrmaǵan sekildi.
«Mine, belgili bir qysqa ýaqytqa berdińizder de, endi bylai dep otyrsyzdar. Birinshi kezekte podstantsiiany turǵyzdyńyzdar. Aqsha dalaǵa ketti. Al qarajattyń bári biýdjetten shyǵyp jatyr», - dedi Nurlan Nyǵmatýlin.
