Qoqys tarifin kótermegen jaǵdaida elimizde turmystyq qatty qaldyqtar máselesi sheshilmeidi. Bul týraly «Qazaqstannyń qaldyqtardy qaita óńdeý strategiiasy» taqyrybynda ótken Frantsiia Qazaqstan saýda-ónerkásip palatasynyń forýmynda Ekologiia, geologiia jáne tabiǵi resýrstar vitse-ministri Ahmetjan Pirimqulov aitty, dep habarlaidy QazAqparat.
«TMD-daǵy eń tómen tarifter bizdiń elde. Eýropa týraly tipten aitpai qoiaiyn. Ókinishke qarai, Almaty qalasy ǵana qoqys shyǵarý tarifin 549 teńgege kóterdi. Astanada bul 246 teńge. Almaty qalasyndaǵy tarifte qoqys shyǵarýmen qatar qaita óńdeý tarifi bar. Al Nur-Sultan qalasyndaǵy tarif tek qoqys shyǵarý men joiý úshin ǵana, qaita óńdeý tarifi joq. Tarif bolmaǵanmen, ádisteme bar. Túbi osyǵan kelýimiz kerek. Biz qoqys tarifin kótermegen jaǵdaida elimizde turmystyq qatty qaldyqtar máselesi sheshilmeitinin túsinýimiz kerek», - deidi vitse-ministri Ahmetjan Pirimqulov.
Ol bul suraq jergilikti atqarýshy organdaryna qatysty ekenin aitty.
«Biz tarif kezeń-kezeńimen kóterilýi kerek dep sanaimyz. Tarif baǵasy ár aimaqta birdei bola almaityny túsinikti. Biz ár aimaqtyń ereksheligin, qaldyq mólsherin, materialdyq jaǵdaiyn, halyqtyń áleýmettik toptaryn eskerýimiz kerek. Bul óte qiyn másele, sondyqtan «tarif baǵasy 500 teńge, nemese 1000 bolýy kerek» dep aitý – durys emes», - deidi vitse-ministr.
Eske sala ketsek, jiynda Frantsiia-Qazaqstan saýda-ónerkásip palatasynyń prezidenti Jerar Fries kásiporyndar qaldyqtarynyń quramynda ýly zattar joq ekendigin dáleldeýi kerek degen pikir aitty.
