Búgin sý tasqyny jaǵdaiyna monitoring jasaý maqsatynda elordanyń shekara mańyndaǵy aýmaqtaryn ushaqpen sholý júrgizildi. Bul týraly QazAqparat QR IIM TJK baspasóz qyzmetine silteme jasap habarlaidy.
28 naýryz kúni QR Ishki ister ministriniń orynbasary Iýrii Ilin, Tótenshe jaǵdailar komiteti, EGTPM Sý resýrstary komiteti, «Kazgidromet» RMK ókilderi elordanyń shekara mańyndaǵy aýmaqtaryna ushaqpen sholý jasady.
«Sholý barysynda Astanalyq sýrettegishke, Viacheslav sý qoimasyna, Qajymuqan, Talapker, Qaraótkel, Ilinka, Taitóbe, Qosshy, Qoiandy, Preobrajensk, Qoshqarbaev, Qabanbai batyr eldi mekenderiniń aýmaqtaryna aerovizýaldy tekserý júrgizildi», - delingen baspasóz habarlamasynda.
Anyqtalǵandai, aýmaqtyń kóp bóliginde qar erý protsesi turaqty júrip jatyr. Sonymen qatar, atalmysh sholý jumysy Astana sý qoimasyndaǵy sý aǵynyn aldyn ala esepteýge múmkindik berdi.
«Eń aldymen, biz Astana sý qoimasy tolýynyń jai-kúiin baiqadyq. Qazir bul sý qoimasy 53% toldy, taǵy 200 mln jýyq tekshe metr qor bar. Búgin baiqaǵanymyzdai, sý qory men qar jabynyn esepke ala kele, bógette 100% sý qory jinalady dep boljap otyrmyz. Nur-Sultan qalasynyń turǵyndary sýsyz qalmaidy», - dedi Iýrii Ilin.
«Qazgidromet» RMK boljamy boiynsha kelesi aptada kúndiz jáne túnde aýa temperatýrasy joǵarylaidy, sondyqtan da qar qarqyndy eridi dep kútilýde. Jer serigi arqyly qashyqtyqtan zondtaý arqyly da táýlik boiy monitoring júrgiziledi.
«Kúshter men quraldardyń qosymsha tobyn biz kelesi aptanyń sońyna qarai ońtústik óńirlerden ortalyq óńirlerge, atap aitqanda, Aqmola jáne Soltústik Qazaqstan oblystaryna kóshirýge daiynbyz», - dedi Iýrii Ilin.
