QR Energetika vitse-ministri Áset Maǵaýov 2021 jylǵy kóktemgi dala jumystaryna dizel otynyn jetkizýge jumystaryn baiandady, dep habarlaidy QazAqparat.
«Munai ónimderiniń jekelegen túrlerin óndirýdi jáne olardyń ainalymyn memlekettik retteý týraly» QR Zańyna sáikes Energetika jáne Aýyl sharýashylyǵy ministrlikteri «Kóktemgi egin jumystaryn júrgizýge dizel otynyn jetkizý boiynsha oblystardy munai óńdeitin zaýyttarǵa jáne resýrs ustaýshylarǵa bekitý kestesin» ázirledi. Keste aiasynda aýyl sharýashylyǵy taýaryn óndirýshilerge Pavlodar munai-himiia zaýyty men «PetroQazaqstan oil prodakts» JShS-dan – tonnasyna 174 myń teńgeden, Atyraý munai óńdeý zaýytynan – tonnasyna 172 myń teńgeden jeńildetilgen dizel bólinedi. Keste boiynsha 380 myń tonna dizel qarastyrylǵan», - dedi Áset Maǵaýov Ortalyq kommýnikatsiialar qyzmetinde ótken baspasóz máslihatynda.
Jetkizýdi jáne basqa da shyǵyndardy eskere otyryp, aýyl sharýashylyǵy taýaryn óndirýshilerge dizel baǵasy janarmai quiý stansalaryndaǵy bólshek saýda baǵasynan 13-14%-ǵa (21-22 teńge/litr) tómen.
«Aýyl sharýashylyǵy taýaryn óndirýshilerge (AShTÓ) munai óńdeý zaýyttarynan dizeldi tiep-jóneltýge basymdyq beriledi. Tiep-jóneltý táýlik saiyn baqylanady jáne qadaǵalanady. Aita ketý kerek, ministrlikte AShTÓ úshin dizel otynyna arzandatylǵan baǵalardy zańnamalyq bekitý quzyreti joq. Biraq, aAýyl sharýashylyǵynyń muqtajdyqtary úshin dizel otynynyń quny janar-jaǵarmai naryǵyna qatysýshylarmen kelisý jolymen aiqyndalady jáne resýrs ustaýshylardyń ózderi erikti túrde belgileidi», - dep túsindirdi vitse-ministr.
Biylǵy 9 naýryzdaǵy jaǵdai boiynsha 11,3 myń tonna dizel tiep-jóneltildi.
