Foto: tr.pinterest.com
Kóktem-kúz ailarynda densaýlyqty saqtaý jáne immýnitetti nyǵaitý óte mańyzdy. Alda kóktem kele jatyr. Osy oraida Ult.kz portalynyń tilshisi immýnitetti kóterý joldaryn qarastyryp kórdi.
Sizde jii sýyq tiiý, temperatýranyń uzaq ýaqyt túspei qoiýy, únemi sharshap júrý, býyndar men bulshyqetterdiń aýyrýy, uiqynyń buzylýy, jii bas aýrýy, teridegi bórtpelerdiń paida bolýy siiaqty belgiler baiqala ma? Bunyń bári immýndyq júieniń jumysynyń buzylýynyń kórinisi. Eger immýnitet túsip ketip, ony kóterý kerek bolsa, aldymen onyń nege túskenin anyqtaý kerek.
Immýnitetti saqtaýǵa yqpal etetin 3 nárse:
*durys uiqy;
* fizikalyq belsendilik;
* durys tamaqtaný.
Durys tamaqtanýǵa kúndelikti ratsion et pen balyq taǵamdary, sút ónimderi, kókónis pen jemis-jidekterden turýy tiis. Kópshilikte dárýmen jetispeýshiligi baiqalady. Mysaly, D dárýmeni jetispese adam boiynda uiqyshyldyq pen álsizdik paida bolady. Sondyqtan árkim ózine qajetti vitaminderdi iship, sportpen ainalysýy tiis. Dárýmenderdi ǵana iship, durys tamaqtanbaý ne bolmasa qunarly tamaqtana otyryp, deneshynyqtyrýmen ainalyspai qoiýǵa bolmaidy.
Demalys pen fizikalyq eńbektiń úilesimi buzylǵanda, únemi depressiia, stress, uiqynyń buzylýy immýnitetti álsirete túsedi. Salamatty ómir saltyn saqtaý, fizikalyq belsendilik, tańǵy jattyǵý, júgirý, jaiaý júrý, júzý, serýendeý, ziiandy ádetterden aýlaq bolǵan mańyzdy.
Deneni shynyqtyrý immýnitetti kóterýde óte mańyzdy ekeni ras. Kóp qimyldaǵan durys, qimyl-qozǵalys kezinde adamnyń qan ainalymy jaqsaryp, bulshyq etteri qalpyna keledi. Deneniń yrǵalýy ishektiń de bulshyq etterin rettep, qyzmetin jaqsartady. Immýnitetti kúsheitý úshin kebekten jasalǵan nan, qyryqqabat, sábiz, askók jáne qyzylshany kóbirek paidalanǵan jaqsy. Al aqýyzǵa bai taǵamdar, ásirese et ishektiń joǵarǵy bólimderinen bastap sińedi de, ziiandy bakteriialar álsireidi. Túrli tuzdyqtar bul protsesti kúsheitedi, sondyqtan etke burysh nemese dámdeýishter qosyp jeýge bolady. Tamaqtan soń 2 as qasyq ósimdik maiyn ishý de óte paidaly.
