Respýblikada «Kóktem-2021» respýblikalyq komandalyq-shtabtyq oqý-jattyǵýy ótýde. Bul týraly QR Tótenshe jaǵdailar ministrliginiń resmi ókili Talǵat Ýáli málim etti, dep habarlaidy "Ult aqparat".
«Azamattyq qorǵaýdyń memlekettik júiesin kóktemgi kezeńdegi TJ-ny joiýǵa daiyndaý, sondai-aq sý tasqyny qaýpi jaǵdaiynda el halqy men aýmaǵyn qorǵaýdy uiymdastyrý boiynsha basqarýshylyq sheshimderdi pysyqtaý maqsatynda 2021 jylǵy 4-5 naýryz aralyǵynda «Kóktem–2021» respýblikalyq komandalyq-shtabtyq oqý-jattyǵý ótkizilýde. Oqý-jattyǵýǵa basshylyq Pavlodar qalasynan júzege asyrylady», - dedi Talǵat Ýáli.
Onyń atap ótýinshe, oqý-jattyǵýǵa ortalyq memlekettik organdardan (respýblikalyq azamattyq qorǵaý qyzmetteri), jergilikti atqarýshy organdardan (tótenshe jaǵdailardyń aldyn alý jáne olardy joiý jónindegi komissiialar), oblystyq, aýdandyq jáne qalalyq azamattyq qorǵaý qyzmetterinen, Tótenshe jaǵdailar, Ishki ister ministrlikteriniń bólimshelerinen, Ulttyq ulannyń áskeri bólimderinen jáne Qorǵanys ministrliginiń kelisimi boiynsha jedel toptardy tartý josparlanǵan.
Tótenshe jaǵdailardy joiý boiynsha transshekaralyq is-sharalardy pysyqtaý aiasynda eldiń shekaralas óńirlerinde Resei men Ózbekstan Respýblikasy TJM bólimsheleriniń shtabtyq oiyndaryna qatysý kózdelgen.
Josparǵa sáikes, osy jyly oqý-jattyǵý jappai sý tasqynyna qarsy is-sharalardy ótkizý boiynsha uiymdastyrylady. Onyń ishinde eldi mekenderden qardy jáne ǵimarattardyń, sondai-aq úi janyndaǵy ýchaskelerdiń, ásirese halyqtyń áleýmettik osal toptarynyń shatyrlarynan muzdy shyǵarý; aryqtardy, kanaldardy, avtomobil jáne temirjol kópirleriniń sý ótkizý qurylystaryn tazalaý jáne seń júrisin jáne tasqyn sýlardy ótkizýge daiyndaý; qorǵanys bógetterin, bógetterdi jáne úiilme qurylystardy nyǵaitý; zardap shekken halyqty ýaqytsha ornalastyrý oryndarynyń (evakýatsiialyq pýnktterdiń) daiyndyǵyn tekserý biryńǵai keshendi mindet formatynda ótkiziledi.
«Oqý-jattyǵý barysynda kóktemgi kezeńdegi yqtimal tótenshe jaǵdailar kezinde, sondai-aq aldaǵy ýaqytta elimizdiń ortalyq óńirlerinde sý tasqyny jaǵdaiy kúrdelengen jaǵdaidaǵy QR TJM Respýblikalyq jedel-qutqarý jasaǵy men áskeri bólimderiniń kúshteri men quraldary toptamasyn jedel kóshirý boiynsha is-qimyldar pysyqtalatyn bolady», - dedi resmi ókil.
Oqý-jattyǵý barysynda azamattyq qorǵaý kúshteri men quraldaryn tótenshe jaǵdailardy joiý jónindegi sheshimderdi ázirlikke keltirý jáne qabyldaýda «Dabyl-1001» men «Tasqyn-2002» eki negizgi signal boiynsha teoriialyq jáne praktikalyq is-qimyldar pysyqtalady. Qabyldanǵan aldyn alý sharalary biylǵy jyldyń kóktemgi kezeńinde tasqyn sýdyń saldaryn barynsha azaitýǵa jáne keltirilgen zalaldy azaitýǵa múmkindik beredi.
