Foto: Úkimet
Kókshetaýda jylý kózderin jóndeý jumystaryn júrgizý úshin Úkimet rezervinen shamamen 1,1 mlrd teńge bólindi. Tiisti qaýlyǵa Premer-ministr Oljas Bektenov qol qoidy, dep habarlaidy Ult.kz.
Qujatqa sáikes, 2025-2026 jyldarǵa arnalǵan jylý berý maýsymyna daiyndyq jáne kezeńniń irkilissiz ótýin qamtamasyz etý maqsatynda Kókshetaý qalasynyń jylý kózinde (AQ-2) jóndeý jumystaryn júrgizý úshin Aqmola oblysynyń biýdjetine qarajat aýdarylady.
Bólingen qarajat «Kókshetaý jylý» kásipornynyń tehnologiialyq protsesterdi basqarýdyń avtomattandyrylǵan júiesin jáne baqylaý-ólsheý aspaptarynyń dalalyq deńgeiin jáne ssý jylytatyn tozań kómir qazandyǵynyń avtomatikasyn, sondai-aq qazandyq agregatynyń qyzdyrý betterin rekonstrýktsiialaý, qazandyq agregatynyń aýa jylytqyshtarynyń tekshelerin jóndeý, tehnologiialyq resýrsy taýsylǵan jabdyqtardyń birlikterin jóndeý jáne aýystyrý jónindegi jobalardy júzege asyrýǵa baǵyttalady.
Eske sala keteiik, Kókshetaý qalasynyń nysandaryn jylýmen jabdyqtaý №1 aýdandyq qazandyq (mazýt) jáne №2 aýdandyq qazandyqtary (kómir) arqyly júzege asyrylady. Alaida jylýmen qamtamasyz etýdiń negizgi kózi tozań kómirmen jumys isteitin №2 aýdandyq qazandyǵy bolyp qala beredi. Jylý jelileriniń jalpy uzyndyǵy 188,7 shaqyrym ( 51 km – magistraldy, 137,7 km – oramishilik). Jelilerdiń negizgi bóligi 1977 jyldan beri jumys istep tur.
2024 jyly Úkimet rezervinen bólingen qarajat esebinen uzyndyǵy 6 shaqyrym magistraldy jeli jóndeldi, sondai-aq № 2 jáne № 3 qazandyq agregattaryna jóndeý júrgizildi. Nátijesinde, aǵymdaǵy jylytý kezeńinde tozý kórsetkishi 45%-dan 43%-ǵa deiin tómendedi, jylý jelilerindegi tehnologiialyq buzylýlar sany 62-den 47-ge deiin azaidy.
