Búgin Kókshetaýda «Latyn álipbiine kóshý - qazaq tiliniń jańa belesi» taqyrybynda dóńgelek ústel ótti, dep habarlaidy "Ult aqparat" oblystyq ishki saiasat basqarmasyna silteme jasap.
Sharaǵa aýdandyq tilderdi oqytý ortalyqtarynyń direktorlary, oqytýshylary men ádiskerleri, halyqty álipbidiń jańa nusqasymen tanystyratyn mekemelerdiń qyzmetkerleri qatysty.
Qalalyq ishki saiasat basqarmasynyń basshysy Altynai Ámirenova óz sózinde búgingi kúni qazaq álipbiiniń latyn álipbiine kóshýi jáne onyń naqty nusqasy boiynsha qaǵidatty máseleler sheshilgen kezde, kún tártibinde aqparattyq - túsindirý jumystaryn uiymdastyrý jáne eresekterdi oqytýǵa daiyndyq boiynsha birqatar másele týyndaitynyn aitty. Muny Aqmola oblystyq oqý-ádistemelik ortalyǵynyń qyzmetkerleri de alǵa tartty.
«Qazaq álipbiin birtindep latyn qarpine kóshirý boiynsha qarqyndy jumys josparlanyp otyr. Jańa álipbige birtindep kóshý 2023-2031 jyldarǵa josparlanǵan. Bul baǵyttaǵy jumystar latyn álipbiine kóshýdi túsindirý, ilgeriletý jáne engizý boiynsha tildik daiyndyq ortalyqtarynda jalǵasýda. «Tilálemi» jáne «Qazlatyn» saittaryndaǵy jańalyqtar men jobalar árdaiym basty nazarda jáne áleýmettik jelilerde jariialanady», - dep atap ótti ádisker Ásemgúl Qarsabaeva.
Qazaq álipbiiniń tarihy boiynsha derekterdi usynǵan Sh.Ýálihanov atyndaǵy Kókshetaý ýniversitetiniń filologiia ǵylymdarynyń magistri Lais Mýsin álipbidiń jańa grafikasy men quramy, dybys – fonema araqatynasy, qazirgi dybys jáne emle normalary máselelerine egjei-tegjeili toqtaldy. Osyndai is-sharalardyń nátijesinde tyńdaýshylar eresek turǵyndardy latyn grafikasyndaǵy qazaq álipbiine oqytý úshin óz bilimderin tolyqtyrýy tiis, dep esepteidi uiymdastyrýshylar.
Is-shara sońynda qatysýshylar jańa latyn grafikasyn engizý baǵytynda júrgizilip jatqan jumystar týraly óz tájiribelerimen bólisti.
