Foto: © ktk.kz
Kókshetaýda áne-mine diplom alyp, muǵalim bolýdy armandap júrgen kolledj stýdenti ózine qol saldy. Emtihannan úsh alǵan boijetken ustazdar ádiletsizdik qyldy dep qatty qamyǵypty. Onysyn anasyna jazǵan hatynda aitqan, dep habarlady KTK.
Jaqsy oqýǵa tyrysqanyn aitqan Aiaýlym biliminiń laiyqty baǵalanbaǵanyna kúiingen. Al kolledjdegiler tómen baǵanyń bulai qaiǵyly jaǵdaiǵa ulasatynyn álbette kútpegen. Olar aǵylshyn tilinen emtihandy qaita tapsyrýǵa múmkindik berdik dep otyr.
Artynda ańyrap qalǵan ata-anasy men týǵan-týysy Aiaýlymnyń bundai áreketke barǵanyna sene alar emes. Aǵasynyń 16 jyl kútken sábiiniń toiynda án aitýǵa ázirlenip kóilegin de daiyndap qoiypty. Al anasy emtihanǵa ketken qyzy habarlasyp, úsh alǵanyn aityp jylaǵanda, birer saǵattan keiin máńgi aiyrylyp qalamyn dep oilamaǵan. Aiaýlym sol kúni qala irgesindegi úiine kelip, qorada jas ómirin qiia salǵan.
"Meniń balapanymdy osyndai jaǵdaiǵa jetkizgeni úshin jaýap bersin. Bir baǵany aiady ma eken?! Meniń qyzymdy sonshama jek kóretindei ne boldy? Bulai qaldyrmaimyz, aryz jazamyz", - deidi marqumnyń anasy Aigúl Ahmetjanova.
Marqumnyń týystary 18 jastaǵy qyzdyń ólimine kolledj ustazdaryn kinálap otyr. Buǵan sebep – Aiaýlymnyń sońǵy haty. Onda marqum ata-anasynyń úmitin aqtai almaǵanyn, ustazdary bilimin ádil baǵalamaǵanyn jazypty. Tórt jyl bilim alǵan pedagogika kolledjdegilerge de bul jáit tóbesinen jai túskendei áser bergen.
"Ol olai emes. Emtihan belgilengen ýaqytynda ótti. Olar jaýaptaryn elektrondy túrde jiberedi. 12 emes, 8 ball aldy. Iá, 3 alǵanyna renjidi. Biraq qaita tapsyrýǵa kelistik. Qaita tapsyrýǵa kelgende taqyryp sol, biraq test basqa ekenin kórip bas tartty. Al kostiýmin sheshkisi kelmedi, ishinde maika ǵana eken. Oǵan jaraidy dedim", - deidi kolledj oqytýshysy Dinara Júsipova.
Aiaýlym úsh alǵany úshin ózine qol salatynyn qasyndaǵy qurbylary da sezbegen. Aǵylshyn tilin jetik meńgerip shetelde jumys isteimin degen asqaq armany bolypty.
Qazir bul is boiynsha tergeý júrip jatyr.
"Ólimge itermeleý babymen sotqa deiingi tergeý bastaldy. Qaiǵyly jaǵdai Krasnyi iar kentinde bolǵan. 18 jastaǵy qyz ózine qol salǵan. Barlyq jaǵdai jan-jaqty tergelip jatyr", - deidi Aqmola oblysy PD baspasóz qyzmetiniń resmi ókili Ásem Ábdirahmanova.
Boijetkenniń ólimine ustazy qoiǵan úshtik baǵa sebep pe, álde basqa jaǵdai áser etti me, ony politsiia anyqtaidy. Al úsh qyzynyń birinen qapyda aiyrylyp qalyp, qaiǵydan qan jutqan ata-ana qalaida kinálini izdep tabamyz dep otyr.
