Kókshetaý qalalyq soty oblys ortalyǵyndaǵy jazǵy dámhananyń 41 jastaǵy iesin segiz jylǵa bas bostandyǵynan aiyrý jáne zardap shekken tarapqa jalpy somasy 13 mln teńgeden astam tóleý týraly úkim shyǵardy, dep habarlaidy "Ult aqparat".
Qaiǵyly oqiǵa 2020 jyldyń 25 aqpanynda Kókshetaý qalasynda boldy. Is materialdarynda kórsetilgendei, dámhana iesi men kelýshi arasynda janjal týyndap, sońy tóbeleske ulasty. Dámhana iesi kelýshini qoimaǵa aparyp, uryp-soǵady.
Zardap shekken adamnyń denesinde sarapshylar kóptegen jaraqatty anyqtaǵan, sonyń ishinde segiz qabyrǵa synǵan, baýyr ezilip ketken.
Alaida, buǵan deiin dámhana iesi qońyraý shalǵan jábirlenýshiniń áieline kúieýi mas ekenin aityp, alyp ketýdi talap etken. Dámhanaǵa kelgen anasy ulynyń ońbai soqqyǵa jyǵylǵanyn anyqtady. Oǵan jábirlenýshini kólikke otyrǵyzýǵa kómektesti, tek úiine jete beriste anasy ulynyń jantásilim etkenin baiqady. Keiin adam óltirgenin bilgen dámhanasy iesi politsiiadan Nur-Sultan qalasyna qashyp ketti.
Sottalýshy sot otyrysy barysynda óz kinásin moiyndamady. Onyń aitýynsha, jábirlenýshi baspaldaqtan qulaǵan kezinde jaraqat alǵan. Alaida sarapshylar munymen kelispedi. Is boiynsha júrgizilgen resmi saraptama kórsetkendei, mundai jaraqatty adam satydan qulaǵan kezde almaidy.
Kókshetaý qalalyq sotynyń sýdiasy Didar Bainiiazov er adamdy Qylmystyq kodekstiń 106-baby 3-bóligi «abaisyzda adam ólimine ákep soqqan densaýlyqqa qasaqana aýyr ziian keltirý» boiynsha kináli dep tanyp, jas balasyn eskere otyryp, er adamdy ortasha qaýipsiz qylmystyq atqarý júiesi mekemesinde ótei otyryp, segiz jyl bas bostandyǵynan aiyrý túrindegi jaza taǵaiyndady.
Zardap shegýshi marqumnyń anasy men áieliniń paidasyna sottalǵan adamnan moraldyq shyǵynnyń ótemi retinde 5 million teńge, materialdyq zalal - 1 million 505 myń teńge, advokatqa tóleý shyǵyny – 1 million 350 myń teńge jáne ókilge aqy tóleý boiynsha 200 myń teńge óndirilip alyndy. Jalpy, sottalýshy 13 million teńgeden astam qarjy tóleýi tiis.
Sot úkimi zańdy kúshine engen joq.
