Foto: Ashyq derekkóz
Kókshetaýda qańǵybas itter 15 jastaǵy qyzǵa shabýyl jasap, jaraqattady. Týa bitken júrek aqaýy bar jasóspirim kolledjge bara jatqan jolda itterdiń ortasynda qalǵan, dep habarlaidy KTK arnasy.
Oqiǵa Zastantsionnyi eldi mekeninde bolǵan. Birinshi kýrs stýdentin buralqy itter kolledj mańynda qapqan. Qatty qoryqqan qyzǵa jedel járdem shaqyrylyp, ol aýrýhanaǵa jetkizilgen. Dárigerler oǵan alǵashqy kómek kórsetip, qutyrmaǵa qarsy ekpe salǵan.
«Qyzym itterge tiispegen, sabaqqa bara jatqan jolda janynan ótip bara jatqan. Qazir úide emdelip jatyr, aiaǵy aýyrady. Bizdiń mańaida da qańǵybas it kóp. Qala ákimdigi bul máseleni sheshse eken», – deidi zardap shekken qyzdyń ákesi Erjan Iskýjenov.
Al veterinariia basqarmasy oqiǵa ornyna it aýlaýshylar jiberilgenin habarlady. Mamandardyń aitýynsha, júreginde aqaýy bar adam úshin mundai kúizelis óte qaýipti.
