Kókshetaýda boijetkendi kóshede pyshaqpen qorqytyp, zorlap, uialy telefonyn tartyp alyp ketken kúdikti ustaldy, dep habarlaidy "Ult aqparat" Aqmola oblystyq politsiia departamentiniń baspasóz qyzmetine silteme jasap.
Vedomstvonyń málimetinshe, Kókshetaý qalalyq politsiiasynyń kezekshi bólimine 20 jastaǵy boijetkennen aryz túsken. Aryzdanýshynyń sózinshe, 2020 jylǵy qyrkúiektiń 29-da tańǵy saǵat 07:30 shamasynda Jambyl jáne Sadýaqasov kósheleriniń qiylysynda belgisiz er adam ony pyshaqpen qorqytyp, zorlaǵan, keiin «Samsýng» uialy telefonyn tartyp alyp, ketip qalǵan.
«Osy is boiynsha oblystyq PD jeke quramy men kúshteri jedel-izdestirý sharasyn qolǵa aldy. Qylmys jasalǵan aýmaqtaǵy beinebaqylaý kameralary qaraldy, sondai-aq, jábirlenýshilerdiń sipattamasy boiynsha uqsas politsiia esebinde turǵan 26 adam tekserildi» deidi vedomstvodan.
PD baspasóz qyzmeti atap ótkendei, jedel-izdestirý sharasy barysynda qazannyń 14-de Zerendi aýdanyndaǵy aýyldardyń birinen 30 jastaǵy kúdikti anyqtalyp, ustaldy.
Kúdikti óz kinásin tolyq moiyndady.
«Qazirgi kezde kúdiktiniń ústinen Qylmystyq kodekstiń 120-babynyń 2-bóligi «Zorlaý» jáne 192-babynyń 2-bóligi «Qaraqshylyq» boiynsha qylmystyq is qozǵalyp, tergeý amaldary júrgizilýde» dep tolyqtyrdy vedomstvodan.
