Kókshetaýdaǵy «Analar úiinde» turyp jatqan analar dákeden meditsinalyq maska tigýde, dep habarlaidy QazAqparat.
«Ana úii» úilestirýshisi kópbalaly ana Quralai Jumabekovanyń aitýynsha, dákeden meditsinalyq maska tigýmen taǵdyr tálkegine túsken alty ana ainalysýda.
«Maska tigemiz dep múlde oilaǵan joqpyz. Mektepte muǵalimder balalarymnan maska ákelýdi talap etti. Ol dárihanalarda bolmaǵan soń ózime qolmen tigýge týral keldi. Keiin suranys túse bastady. Osylaisha, Ana úiindegi alty ana jappai tige bastady», - deidi Quralai Jumabekova.
Onyń aitýynsha, búgingi kúni 600 maskany obys ortalyǵyndaǵy áleýmettik mekemeler men jeke adamdar satyp alǵan.
«Maska tigýdi qolǵa almas buryn TJD-dan maskanyń standartyn aldyq. Alty qabat dákeden turatyn maskany birneshe ret qoldanýǵa bolady. Búgingi kúnge deiin qaladaǵy áleýmettik mekemeler men jeke adamdarǵa 600 maskany sattyq. Mundaǵy bir maskanyń quny 120 teńge. Taǵy 3 myń maskaǵa suranys tústi, áli de suranys túsýde. Ózimiz úlgermeitin bolǵandyqtan, úide bala kútýmen otyrǵan analardy jaldadyq. Budan bólek, dákeni qiyp kómektesip otyrýǵa 50 eriktini jaldadyq», - dep tolyqtyrdy Quralai Jumabekova.
Onyń sózinshe, qoldan tigilgen maskany satyp alǵan adam ózin virýstan qorǵap qana qoimaidy, «Ana úiinde» turyp jatqan ana men balaǵa qoldaý kórsetpekshi.
Aita keteiik, Kókshetaý qalasynda turatyn «Kúmis alqa» iegeri Quralai Jumabekova týǵan balalaryna ǵana emes, ózgeniń balalaryna da jeterliktei analyq mahabbatqa toly úlken júrek iesi. Alty balany dúniege ákelip, taǵy bes balany baýyryna basqan ol qoǵamdyq jumystarǵa da belsendi aralasýda.
