Kókshetaýda jalǵyzbasty zeinetkerdiń páterinen eki samosval qoqys shyǵaryldy. Qariianyń ózi aýrýhanaǵa jatqyzyldy, dep habarlaidy QazAqparat.
Aqmola oblystyq politsiia departamenti baspasóz qyzmetiniń málimetinshe, Kókshetaý qalasy politsiia basqarmasynyń №4 ýchaskelik politsiia pýnktine Temirjol kóshesinde ornalasqan kóp qabatty turǵyn úidiń turǵyndary júgingen.
«Oblys ortalyǵy turǵyndary qart áieldiń páterinde antisanitariialyq jaǵdai ornaýyna bailanysty kórshi turatyn zeinetkerge shara qoldanýdy surady»,-dep atap ótti vedomstvodan.
Memleket basshysynyń Joldaýyn iske asyrý úshin Aqmola oblysynda politsiia jumysynyń servistik formatyn qamtamasyz etý bóliginde komissiianyń osy meken-jaiǵa shyǵýyn júzege asyrý týraly sheshim qabyldandy.
Jumys tobynyń quramyna politseilerden basqa, jergilikti atqarýshy organdardyń ókilderi men qalanyń sanitarlyq-epidemiologiialyq qyzmetiniń mamandary kirdi.
Tekserý barysynda fakt tolyǵymen rastaldy.
«Oblys ortalyǵynyń 72 jastaǵy turǵyny egde jasyna jáne densaýlyq jaǵdaiyna bailanysty páterdi tiisti deńgeide ustai almaǵany anyqtaldy. Turǵyn úide jándikter men kemirgishterdiń paida bolýyna, sondai-aq jaǵymsyz iistiń shyǵýyna yqpal etetin kóptegen turmystyq qaldyqtar tabyldy», - dep tolyqtyrdy vedomstvodan.
Qazaqstan Respýblikasy Táýelsizdiginiń 30 jyldyǵyna arnalǵan «30 igi is» aktsiiasy aiasynda Kókshetaý qalasy politsiia basqarmasynyń qyzmetkerleri jergilikti atqarýshy organdarmen birlesip barlyq jinalǵan turmystyq qaldyqtardy jinap, keiinnen sanitarlyq baqylaý qyzmeti úi-jaidy dezinfektsiialady.
Bólmeni tazartý úshin samosval qoldanyldy. Nátijesinde eki mashina qoqys jinaldy.
Qazirgi ýaqytta páter turǵyny aýrýhanaǵa jatqyzylyp, em alýda.
