Aqmola oblysyndaǵy «Kókshetaý» memlekettik ulttyq tabiǵi parkiniń aýmaǵynda orman órti tirkeldi. Qazir tilsiz jaý tolyqtai sóndirildi, dep habarlaidy ult.kz.
Orman sharýashylyǵy jáne janýarlar dúniesi komitetiniń baspasóz qyzmetiniń habarlaýynsha, 17 maýsym kúni saǵat 15:59 shamasynda ulttyq parktiń Aryqbalyq filialyna qarasty Torǵai ormanshylyǵynda órt shyqqan.
Málimetke sáikes, qyzyl jalyn jalpy 11,58 gektar aýmaqty sharpyǵan. Onyń 0,38 gektary orman alqaby bolsa, 11,2 gektary ormansyz jaiylym jerge tiesili.
Órtti sóndirýge 24 adam men 8 arnaiy tehnika jumyldyryldy.
«Kókshetaý» ulttyq parkiniń mamandary turǵyndardy tabiǵat aiasynda órt qaýipsizdigi erejelerin qatań saqtaýǵa shaqyrdy. Mamandardyń aitýynsha, bolmashy uqypsyzdyqtyń ózi tabiǵatqa orasan ziian keltirýi múmkin.
