Eńbek jáne halyqty áleýmettik qorǵaý ministrligi Kóksáiek arnaýly áleýmettik qyzmetter kórsetý ortalyǵyn tekserý nátijelerin talqylady.
Onlain-rejimde ótken Áleýmettik jumystyń basym baǵyttary máseleleri jónindegi vedomstvoaralyq keńes otyrysy barysynda Túrkistan oblysynyń №3 Kóksáiek arnaýly áleýmettik qyzmetter kórsetý ortalyǵynyń arnaiy monitoring toby júrgizgen tekserý nátijesi qaraldy.
QR Eńbek jáne halyqty áleýmettik qorǵaý vitse-ministri Erlan Áýkenovtiń tóraǵalyǵymen ótken is-sharaǵa Túrkistan oblysy ákiminiń orynbasary Ulan Tájibaev, QR Adam quqyqtary jónindegi ýákil Elvira Ázimova, beiindi memlekettik jáne jergilikti atqarýshy organdardyń qyzmetkerleri, úkimettik emes uiymdardyń ókilderi qatysty.
Buǵan deiin qoǵam belsendisi Aqmaral Ómiralinova (Madelhanova) áleýmettik jelilerde qyzmet alýshylar men ortalyq qyzmetkerleriniń quqyqtarynyń buzylýy týraly aitqan bolatyn. Tekserý júrgizý úshin monitoring toby quryldy, onyń quramyna quzyretti ortalyq memlekettik jáne jergilikti atqarýshy organdardyń mamandary, sondai-aq Aqmaral Ómiralinova kirdi.
Otyrys barysynda QR Eńbekmini Eńbek, áleýmettik qorǵaý jáne kóshi-qon komiteti tóraǵasynyń orynbasary Asqar Aimaǵambetov tekserý nátijeleri qyzmetkerlerdiń eńbek qatynastary men jumys rejiminiń buzylý faktilerin kórsetkenin habarlady. Sondai-aq, meditsinalyq qyzmet kórsetý, sanitariialyq normalardy saqtamaý, qyzmet alýshylardy dene eńbegine tartý bóliginde buzýshylyqtarǵa jol berilgen.
Budan basqa, materialdyq-tehnikalyq bazanyń álsiz jaraqtandyrylýy, keibir satyp alynǵan taýarlardyń (sút ónimderi, jumsaq qural-saiman jáne kiim-keshek tehnikalyq erekshelikke sáikes kelmedi) sáikessizdigi anyqtaldy, sondai-aq keibir taýarlarda sáikestik sertifikaty bolǵan joq.
Otyrys barysynda Kóksáiek ortalyǵynyń direktory Imanáli Amangeldiev ortalyqtyń qyzmetin jaqsartý boiynsha ázirlengen jáne bekitilgen qysqamerzimdi jáne uzaqmerzimdi josparlar negizinde materialdyq-tehnikalyq bazaǵa tolyq túgendeý júrgizilgenin jáne sapaly qyzmet kórsetý úshin qajetti negizgi quraldardy satyp alýǵa biýdjettik ótinimder jasalǵanyn habarlady.
Olarǵa ǵimarat pen jabdyqty jóndeý, internet bailanysyn jaqsartý, beinebaqylaý júiesin jańartý kiredi. Ortalyq janynan qoǵamdyq baqylaý keńesi quryldy, ol ortalyq qyzmetiniń ashyqtyǵy men aiqyndyǵyn qamtamasyz etý, kórsetiletin qyzmetti alýshylardyń zańdy quqyqtaryn saqtaý jónindegi jumysqa belsendi túrde kiristi.
Túrkistan oblysynyń jumyspen qamtýdy úilestirý jáne áleýmettik baǵdarlamalar basqarmasynyń basshysy Ásiia Temirbaeva óńirde arnaiy áleýmettik qyzmetter usynatyn uiymdar jelisin keńeitý boiynsha qabyldanyp jatqan sharalar týraly aityp berdi.
Máselen, Túrkistan oblysynyń qurylýyna jáne birneshe meditsinalyq-áleýmettik mekemelerdiń 2018 jyly Shymkent qalasynyń balansyna berilýine bailanysty Túrkistan oblysyn damytýdyń 2024 jylǵa deiingi keshendi josparyn iske asyrý sheńberinde Túrkistan, Arys jáne Kentaý qalalarynda, sondai-aq Keles jáne Túlkibas aýdandarynda syiymdylyǵy az arnaýly áleýmettik qyzmet kórsetý ortalyqtaryn salý kózdelgen.
Kentaý qalasynda 200 oryndyq múgedekterdi ońaltý ortalyǵynyń qurylysyna memlekettik saraptamanyń qorytyndysy alyndy, 50 oryndyq 6 áleýmettik nysannyń qurylysy boiynsha jobalyq-smetalyq qujattama memlekettik saraptamanyń qaraýynda jatyr.
Bul nysandardyń qurylysy memlekettik qarajat esebinen de, biznestiń áleýmettik jaýapkershiligi aiasyndaǵy demeýshilik qarajat esebinen de josparlanyp otyr.
Máselen, 2020 jyldyń 4 maýsymynda oblys ákimdigi, «Symbat-Ai» JShS jáne Keles, Túlkibas aýdandary men Kentaý qalasynyń ákimdikteri arasynda qaiyrymdylyq kómek retinde investordyń óz qarajaty esebinen biznestiń áleýmettik jaýapkershiligi sheńberinde qurylys júrgizý týraly ózara yntymaqtastyq týraly úsh jaqty memorandýmǵa qol qoiyldy.
Úsh nysan qurylysynyń jalpy quny - boljam boiynsha 6,9 mlrd teńge. Qurylysty aiaqtaý jáne 3 nysandy paidalanýǵa berý 2021 jyldyń kóktemine josparlanǵan.
Vedomstvoaralyq keńestiń qatysýshylaryna tyńdaý nátijeleri boiynsha jumys istep turǵan MÁM-di úlkeitý, shaǵyn jinaqtalǵan áleýmettik mekemeler salý jáne úkimettik emes uiymdar arqyly arnaýly áleýmettik qyzmetter kórsetýge memlekettik áleýmettik tapsyrys sheńberinde qarjylandyrý kólemin ulǵaitý máselesin qaraý boiynsha usynymdar berildi.
