Foto: Aqparat ministrligi
Astanada ótetin 5 Dúniejúzilik kóshpendiler oiyndary qarsańynda kókpardan Qazaqstan ulttyq quramasy Almaty oblysynda oqý-jattyǵý jiyndaryn ótkizip jatyr.
Ulttyq quramanyń bas bapkeri Aqylbai Mankeevtiń aitýynsha, osy oqý-jattyǵý jiyny aiasynda qyrkúiekte ótetin oiyndarǵa qatysatyn jylqylar daiyndalyp jatyr. Barlyǵy 40 jylqynyń ishinen myqtylary iriktelip alynady. Onyń sózinshe, komanda daiyndyǵy qazir jaqsy deńgeide. Ulttyq quramaǵa Qyrǵyzstan men Ózbekstannan kelgen komandalar myqty qarsylas bola alady.
"Eki aidan beri 5-shi Dúniejúzilik kóshpendiler oiyndaryna belsendi daiyndalyp jatyrmyz. Elimizdiń namysyn abyroimen qorǵaimyz dep úmittenemiz. Osyndai mańyzdy sporttyq jarystyń elimizde ótip jatqany bizge úlken jaýapkershilik júkteidi. Birinshi oqý-jattyǵý jiynynda ózimizdiń kúsh-qairatymyzǵa basa mán bersek, endi jylqylardy daiyndap jatyrmyz", - dedi kókpardan Ulttyq qurama múshesi Ádilet Mamyt.
Esterińizge sala keteiik, Respýblikalyq kókpar federatsiiasy Ulttyq sport túrleri qaýymdastyǵynyń quramyna kiredi. Sonymen qatar, qaýymdastyq quramynda Báige, Jamby atý, Aýdaryspaq, Sadaq atý, Qusbegilik, Asyq atý, Teńge ilý, JORYQ jáne t.b. federatsiialar bar. Al qaýymdastyqty belgili kásipker, metsenat, Altyn Qyran Foundation qoǵamdyq qory qamqorshylyq keńesiniń tóraǵasy Islambek Saljanov basqarady.
