Sholpan Atada ótken dúniejúzilik kóshpendiler oiynynda qazaq-ózbek kókparshylarynyń kezdesýi úlken daý týdyrǵan bolatyn. Jartylai finalda elimizdiń shabandozdary ala shapandylarǵa ese jiberip, qyrǵyzdardyń hám qazaq halqynyń synyna ushyraǵan.
Degenmen Qyrǵyzstannyń Osh oblysynda djiý-djitsý (ne-vaza) boiynsha ótken halyqaralyq týrnir «Alau open-de» elimizdiń palýandary ese qaitaryp, qazaq sportshylarynyń myqty ekenin kezekti ret dáleldedi.
Atalǵan týrnirge "Sagadat batyr QTT" sport klýbynan 7 men 17 jas aralyǵynda 23, al eresekterden 4 sportshy Qazaqstan namysyn qorǵap barǵan bolatyn.
Erekshe atap ótetin sportshynyń biri – 11 jastaǵy Jibek Qulymbetova.
Talai sportshynyń jaýyrynyn jer iisketken sportshy qyzdyń qorjynynda – «Álem chempiony», Halyqaralyq týrnirlerdiń jeńimpazy titýly bar. Bul saiysta qyrǵyz, ózbek, tájik sportshylaryn tize búktirip, altyn alqa qanjyǵalady. Osy týrnirde Jibek Qulymbetova qyrǵyz, ózbek, tájik sportshylaryn utyp qana qoiǵan joq, ul balalar arasynda chempion atanǵan qyz boldy.
84 kelige deiingi salmaqta jeńiske jetken Nursultan Orynbasarov atalmysh klýbtyń bapkeri. Nursultan ártúrli sebepke bailanysta sporttan birshama ýaqyt qol úzip qalǵan bolatyn. Óziniń týǵan kúninde ózine syilyq jasaǵan sportsmen sportqa qaita oralǵanyn málimdedi.
Sondai-aq, "Sagadat batyr QTT" klýbynyń bapkeri Samat Aitpanbet el abyroiyn asqaqtatyp, komanda qorjynyna altynnan alqa qosty.
Nursultan Orynbasarov jetekshilik etetin "Sagadat batyr - QTT" sport klýbynyń qorjynynda jalpy 25 medal bar: onyń 15 altyn, 5 kúmis, 5 qola.
