Áleýmettik jelide qoǵamnyń ashýyn týǵyzǵan videodaǵy qatarlastaryna álimjettik jasaǵan oqýshylar anyqtaldy. Bul týraly QR IIM Ishki jáne syrtqy kommýnikatsiialar departamentiniń direktory Almas Sadýbaev aitty, dep habarlaidy "Ult aqparat".
Onyń aitýynsha, 21 qańtar kúni áleýmettik jelige taraǵan materialda bir top joǵary synyp oqýshylarynyń ózderinen jasy kishi 2 oqýshyǵa álimjettik jasap, soqqynyń astyna alǵandyǵy beinelengen.
«Ishki ister ministrligi videoaqparatqa «shuǵyl ún qatyp, taratylǵan málimetterdi anyqtaý sharalaryn qabyldady. Videojazbadaǵy oqiǵa 18 qańtar kúni Túrkistan qalasynda bolǵan. Buzaqylyq áreketke qatysýshylardyń barlyǵy anyqtaldy. Qazirgi ýaqytta QR QK 293-baby 2 tarmaǵynda qarastyrylǵan qylmys belgileri boiynsha sotqa deiingi tergeý amaldary júrgizilýde», - dedi Almas Sadýbaev.
Departament basshysynyń sózine qaraǵanda, Ishki ister ministrligi jasóspirimderdiń zardap shekendigin eskere otyryp, oqiǵanyń mán-jaiyn tyńǵylyqty tekseretin bolady.
Sonymen qatar, óńirdiń jergilikti atqarýshy organdaryna mundai oqiǵalardyń aldyn alý sharalaryn júzege asyrýǵa bastamashylyq jasaidy.
