Keshe Aqparat jáne qoǵamdyq damý ministri Aida Balaeva Almatydaǵy jetekshi respýblikalyq úkimettik emes uiymdarmen, bedeldi qoǵam qairatkerlerimen jáne belsendi eriktiler birlestikterimen birqatar kezdesýler ótkizdi.
Otyrys barysynda azamattyq sektordyń jańa zańnamalyq bastamalardy, azamattyq qoǵamdy damytý Tujyrymdamasyn, «Estitin memleket» Tujyrymdamasyn, azamattyq qoǵamnyń el Prezidentiniń Joldaýyn iske asyrýdaǵy jáne halyqpen keri bailanys ornatýdaǵy rólin talqylaýǵa qatysý máseleleri talqylandy, dep habarlaidy "Ult aqparat" ministrliktiń baspasóz qyzmetine silteme jasap.
Ministr úkimettik emes sektordyń tótenshe jaǵdailar men karantin jaǵdaiynda halyqty qoldaý sharalaryn iske asyrýdaǵy úlesin atap ótti.
Aida Balaevanyń aitýynsha, ministrlik ashyqtyq pen azamattyq qoǵam institýttarymen tyǵyz ózara is-qimyl qaǵidatyn ustanady. Halyqpen kezdesýler turaqty, ári salalyq negizde ótkiziletin bolady. Ministrlik memlekettik baǵdarlamalardyń iske asyrylý barysy týraly halyqtyń barynsha habardar bolýyna jáne azamattardyń osy baǵdarlamalarǵa qatysýyn erekshe nazarda ustaityn bolady.
«Úkimettik emes uiymdardyń qatysýymen júzege asyrylatyn Memlekettik organdar tarapynan josparlaǵan áleýmettik jobalar, qazaqstandyqtardyń suranystary men qajettilikterine negizdelýi kerek. Sonymen qatar, josparlaý, memlekettik áleýmettik tapsyrysty qalyptastyrý, memlekettik granttyq qarjylandyrý máseleleri ashyq bolýy tiis. Ministrlik halyqtyń ártúrli maqsatty toptaryn (erekshe qajettilikteri bar adamdar, NEET sanatyndaǵy jastar (bilimi men daǵdylary joq), kópbalaly otbasylar jáne t.b.) quqyqtyq, qarjylyq, sandyq saýattylyq pen daǵdylarǵa úiretýge baǵyttalǵan jobalardy ázirleidi», - dedi ministr.
Aida Balaeva ÚEU otyrysta aitylǵan barlyq usynystar eskerilip, ministrliktiń josparyna engiziletin bolady dep sendirdi.
Úkimettik emes uiymdar memlekettik organdarmen ózara is-qimyldy, volonterlyq jáne arnaiy áleýmettik qyzmetter salasyndaǵy zańnamany jetildirý boiynsha naqty usynystaryn bildirdi. Ministrliktiń ashyq dialog pen birlesken jumysqa daiyn ekendigin atap ótti.
