Aqparat jáne qoǵamdyq damý ministri Aida Balaeva Prezident Joldaýyn iske asyrý boiynsha qoǵamdyq keńesterdiń jumysy týraly aitty, dep habarlaidy QazAqparat.
Ministrdiń aitýynsha búkil el boiynsha ortalyq jáne jergilikti bilik organdarynyń janynan 234 qoǵamdyq keńes qurylǵan. Olardyń quramyna qoǵamnyń túrli toptarynyń múddelerin qorǵaityn 3,5 myńǵa jýyq belsendi azamattar tartylǵan.
«Negizinen bul ǵylymi-shyǵarmashylyq intelligentsiianyń, Úkimettik emes uiymdardyń, sarapshylar qaýymdastyǵynyń ókilderi jáne basqa da belsendi azamattar bar. Jalpy osy jyldar ishinde, atap aitqanda qoǵamdyq keńester 19 myńnan astam normativtik quqyqtyq akti jobalaryn qarady», - dedi Aida Balaeva OKQ-da ótken baspasóz máslihatynda.
Aida Balaeva qoǵamdyq keńester barlyq áleýmettik taqyryptar boiynsha táýelsiz monitoringter men tyńdaýlar ótkize alatynyn jetkizdi.
«Atap aitqanda qoǵamdyq kólik, turǵyn úi qurylysy, jol jóndeý, PIK qyzmetteri, eń qajetti taýarlardyń baǵasy jáne basqa taqyryptar 1 myńnan astam zertteý júrgizdi. 1500-den astam qoǵamdyq talqylaý ótkizilip, onyń ishinde sýmen jabdyqtaý, sanitarlyq ahýaldy jaqsartý, meditsina men bilim berýdegi qyzmet kórsetý sapasy siiaqty basqa da taqyryptar qamtyldy. Iaǵni munyń barlyǵy qoǵamdyq keńestiń qajettigi men múmkindigi ǵana emes, bul jobanyń keleshegi zor ekenin kórsetip otyr», - deidi ministr.
