QR Qoǵamdyq damý ministri Darxan Káletaev qoǵamdyq keńesterdiń negizgi problemalaryn atady, dep xabarlaidy QazAqparat tilshisi.
Ministrdiń sózine qaraǵanda, búginde qoǵamdyq keńesterdiń kemshin tustary az emes. Máselen, qoǵamdyq keńester men máslixattardyń jumysy kóp jaǵdaida qaitalanyp jatady. Bylaisha aitqanda, keńester máslixattardyń kóshirmesi ispetti.
«Budan bólek, keńesterdiń quramynda úkimettik emes uiymdardyń úlesin arttyrý qajet. Búginde olardyń sany 35 protsentti ǵana quraidy. Sosyn azamattyq institýttardyń anyqtamasy tym keńeitip berilgen. Osynyń saldarynan keńesterge ardagerler uiymdary men partiialardy tyqpalap jatady. Negizi, men ózim oilaimyn, qoǵamdyq keńesterdiń quramynda partiia músheleri bolmaýy tiis. Buryn memlekettik qyzmette istegen azamattar da kóptep keledi. Degenmen, onyń da proportsiiasyn saqtaý kerek siiaqty. Áitpese, úkimettik emes uiymdardyń sheshimdi qabyldaýǵa qatysý deńgeii tómendei beredi», - dedi D.Káletaev qoǵamdyq keńesterdiń II respýblikalyq májilisinde.
Onyń aitýynsha, qazirgi kezde qoǵamdyq keńester «aqsaqaldar jinalysy» bolyp ketti. Sebebi 60 jastan asqandardyń úlesi 30 protsentten artyp jyǵylady. Genderlik tepe-teńdik te joq. Er adamdardyń sany jartysynan kóp. Al jastardyń úlesi 5-aq protsentti quraidy. Qoǵamdyq keńes músheleriniń sany saqtalmaidy. Memlekettik organdar keńestiń quramyn óz betinshe jasaqtai beredi. Ondaida aimaqtyń demografiialyq jaǵdaiy da eskerilmeidi. Máselen, Aqtóbe men Batys Qazaqstanda eń kóp qoǵamdyq keńester tirkelgen. Alaida atalǵan oblystarda xalyq sany kóp emes.
«Budan bólek, qoǵamdyq keńesterdiń sheshim qabyldaý jumysyn standarttaý qajet. Áitpese, búginde keńesterdiń sheshimi tek keńes berý sipatynda ǵana júredi. Ondaida atqarylǵan jumystyń tiimdiligin baǵalaý qiyn. Sondyqtan keńesterdiń sheshim qabyldaýǵa yqpal etý quraldaryn damytqan jón. Qoǵamdyq keńesterdiń normativtik-quqyqtyq aktilerdi qarastyrý jaǵy da álsiz. Byltyr keńester shamamen 9 myń aktini qarap shyqty. Alaida tek 10 protsenti boiynsha túsinikteme berildi. Árine, on kún az. Ekonomikalyq damý jáne yntymaqtatyq uiymyna múshe memleketterde oǵan tórt-alty apta beriledi», - dep atap kórsetti D.Káletaev.
Sondai-aq, búginde bir adam birneshe keńestiń quramynda júre beredi. Ony da toqtatý qajet. Al qoǵamdyq keńesterdiń resmi saittarynda tushymdy aqparat joq. Qalalyq keńesterdiń saittarynda birshama málimet bolsa da, jergilikti resýrstarda aqparat múldem jariialanbaidy.
