Nur-Sultan qalasynyń qoǵamdyq keńes otyrysynda jumyrtqa men kúnbaǵys maiynyń baǵasyn turaqtandyrý máselesi talqylandy, dep habarlaidy "Ult aqparat".
Elordanyń qoǵamdyq keńes otyrysynda áleýmettik mańyzy bar azyq-túlik baǵasyn turaqty ustaý máselesi qaraldy. Nur-Sultan qalasynyń investitsiialar jáne kásipkerlikti damytý basqarmasynyń basshysy Erlan Bekmyrzaevtyń aitýynsha, sońǵy kezde eki birdei áleýmettik mańyzy bar taýardyń baǵasy shekten asyp ketken. Osy baǵany turaqtandyrý úshin ákimdik jańa shekti baǵany bekitýdi usyndy.
«Nur-Sultan qalasy ákimdiginiń áleýmettik mańyzy bar azyq-túlik taýarlarǵa shekti ruqsat etilgen bólshek saýda baǵalarynyń mólsherin bekitý týraly qaýly jobasyn usynyp otyrmyz. Bul joba saýda qyzmetin retteý týraly QR zańynyń sheńberinde ázirlendi. Oǵan sáikes jergilikti atqarýshy organ quzyretinde aimaqtyq shekti ruqsat etilgen saýda baǵalarynyń mólsherin bekitý kiredi. Shekti mánder 15 paiyzdan asqan kezde jáne bólshek saýda baǵalary bir ýaqytta 30 kún ishinde 30 paiyzǵa ósken kezde qala ákimdigi ruqsat etilgen shekti bólshek saýda baǵalaryn belgileýi tiis», - dedi basqarma basshysy.
Ol, sondai-aq, mundai qadamǵa barýǵa jumyrtqa men kúnbaǵys maiynyń shekten tys qymbattaýy sebep bolǵanyn atady.
«Búgingi tańda Nur-Sultan qalasynda áleýmettik mańyzy bar azyq-túliktiń eki pozitsiiasy boiynsha shekti mánnen asyp ketiý baiqalýda. Taýyqtyń jumyrtqasy 22 paiyzǵa, kúnbaǵys maiy 18 paiyzǵa ósti. Turaqtandyrý tetikterin eki ónimge shekti ruqsat etilgen bólshek saýda baǵalaryn bekitý týraly sheshim qabyldandy. Shekti ruqsat etilgen bólshek saýda baǵasyn bekitý tártibi shekti jáne shekti ruqsat etilgen bólshek saýda baǵalaryn belgileý qaǵidattarynyń úshinshi bóliminde reglamenttelgen», - deidi Erlan Bekmyrzaev.
Qoǵamdyq keńes ókilderiniń jumyrtqanyń qymbattaý sebepteri qandai degen saýalyna ákimdik ókili byltyr jazdaǵy qus tumaýy basty sebep dep jaýap qatty.
«Qazaqstandaǵy barlyq óńirde taýyq jumyrtqasy baǵasynyń qymbattaǵany baiqalyp otyr. Eń negizgi sebebi byltyr, qus tumaýynan taýyq qyryldy. Aýrýdy odan ári tartatpaý úshin milliondaǵan taýyqty zalasyzdandyryp joiýǵa jiberdi. Ekinshiden jem baǵasy qymbattady. Úshinshi sebep maýsymdyq qymbattaý. Negizgi sebepteri osylar. Jemniń qymbattaýy. Úshinshi sebep maýsymdyq tendentsiia. Negizgi sebepter osylar», - deidi basqarma basshysy.
Qoǵamdyq keńes ókilderi sońǵy kezde kásipkerler arasynda byltyrǵy qus tumaýyn syltaýratyp, baǵany qaita-qaita kóterý beleń alyp turǵanyn eskertip, jem qymbattady degen máseleni de tyńǵylyqty zerdeleýdi usyndy. Astanaǵa irgeles jatqan óńirlerdiń ákimdikteri qus tumaýynan zardap shekken óndirýshilerdi túrli tetikter arqyly qoldaý arqyly jumyrtqa baǵasyn turaqty ustap turǵanyn eske salyp, baǵany negizsiz ósirgenderdiń máselesin qatań qarap, shara qoldanýdy surady.
