Búgin onlain túrde «Qoǵamdyq baqylaý týraly» zań jobasyn talqylaý boiynsha dóńgelek ústel ótti. Talqylaýǵa QR Aqparat jáne qoǵamdyq damý ministri Aida Balaeva jáne QR Parlamentiniń depýtattary, sarapshylar, azamattyq qoǵam ókilderi qatysty, dep habarlaidy "Ult aqparat" vedomstvonyń baspasóz qyzmetine silteme jasap.
Aida Balaevanyń aitýynsha, ázirlengen zań jobasy – bul barlyq múddeli taraptar, sonyń ishinde sarapshylar, zańgerler, quqyq qorǵaýshylar, qoǵam qairatkerleri kiretin jumys toby músheleriniń ujymdyq eńbegi. Sondai-aq, ol zań jobasyn ázirleý kezinde qoǵam ókilderiniń qaǵidattyq ustanymdary tolyq eskerilgenin atap ótti.
Zań jobasyna sáikes qoǵamdyq baqylaýdy júzege asyratyn tulǵalar toby aitarlyqtai keńeitilip, olardyń ishine Qazaqstan Respýblikasynyń azamattary men kommertsiialyq emes uiymdar kirdi.
Sonymen qatar, qoǵam ókilderiniń usynystary boiynsha qoǵamdyq baqylaý obektileriniń tizbesine biýdjet qarajatyn alatyn zańdy tulǵalar engen bolatyn.
Zań jobasynda qoǵamdyq baqylaýdyń birqatar mańyzdy qaǵidalary bekitilgen, olardyń ishinde alýan túrli nysandar, adamnyń jáne azamattyń konstitýtsiialyq quqyqtaryn, bostandyqtary men zańdy múddelerin saqtaý, jariialylyq, ashyqtyq, qoǵamdyq baqylaýdy júzege asyrýdyń zańdylyǵy qamtylady.
Zań jobasyn talqylaý barysynda QR Adam quqyqtary jónindegi ýákili Elvira Azimova zań jobasynyń azamattyq qoǵam úshin mańyzdylyǵyn jáne qoǵamdyq baqylaýdy zańnamalyq retteý qajettiligin atap ótti.
Zań jobasyn ázirleýshilerdiń habarynsha, atalǵan zań jobasynyń ereksheligi – ol memlekettik tilde ázirlenýinde. Zańdy ázirleýge L.N.Gýmilev atyndaǵy EUÝ Quqyq jáne salystyrmaly quqyqtaný ǴZI direktory, zań ǵylymdarynyń kandidaty Qazybek Dáýitáliev belsendi qatysýda.
«Zań jobasy qoǵamdyq baqylaýdy júzege asyrýdyń negizderin qamtidy jáne qoǵam ókilderine qoǵamdyq baqylaýdy júzege asyrýǵa qatysýy úshin barlyq jaǵdai jasaidy», - dedi Q.Dáýitaliev.
QR Parlamenti Májilisiniń depýtaty Erlan Sairov zań jobasynyń sapaly ázirlengenin atap ótip, zań jobasy Parlament Májilisi qabyrǵasynda qoǵam ókilderiniń qatysýymen belsendi túrde talqylanatynyna senimin bildirdi.
Sondai-aq, talqylaý barysynda belgili sarapshylar men azamattyq qoǵam ókilderi Aigúl Soloveva, Záýresh Battalova, Rahym Oshaqbaev, Serik Berkamalov, Evgenii Jovtis jáne basqalar sóz sóiledi.
Is-shara sońynda ministr kezdesýdiń barlyq qatysýshylaryna zań jobasyn ázirleýge belsendi qatysqandary úshin alǵys bildirdi.
