QR Aqparat jáne qoǵamdyq damý ministrliginiń qoldaýymen qurylǵan Qoǵamdyq baqylaý qatysýshylary bul joly birqatar qalaǵa baryp, sanitarlyq-epidemiologiialyq talaptardyń buzylǵanyn anyqtady. "Ult aqparat" Qazaqstannyń sanitarlyq talaptar saqtalmaǵan aimaqtar tizimin usynady.
Nur-Sultanda qoǵamdyq kólikte jáne «Mega Silk Way» saýda, oiyn-saýyq ortalyǵynda turǵyndar áleýmettik qashyqtyqty saqtamaidy jáne maska rejimin buzýda. «Qoǵamdyq baqylaý» toby qoǵamdyq kólikterdiń 80-90% tolatynyn anyqtady.
Sodan keiin baqylaýshylar Qaraǵandy qalasyndaǵy ortalyq bazar men vokzalǵa bardy. Toptyń aitýynsha, biznes tarapynan birneshe norma saqtalyp jatqan joq: kirý/shyǵý esikteri bólinbegen, antiseptikterdiń sertifikaty joq. Kórer kóz ben iis arqyly munyń jai ǵana sý nemese keibirinde sý aralasqan suiyq sabyn ekenin baiqaýǵa bolady. Bazar aialdamasy adamǵa tolǵan, áleýmettik qashyqtyq pen maska rejimi de saqtalmaýda.
Pavlodarda maska rejimi jalpy saqtalǵan, biraq saýda, oiyn-saýyq ortalyqtary men qoǵamdyq oryndarda áleýmettik qashyqtyq joq. Saýda-oiyn-saýyq ortalyǵyna kiretin adamdar sany shekteýli bolǵandyqtan, ortalyq aldynda kezek paida bolǵan. Sondai-aq jalpy bilim beretin mektepterge monitoring júrgizildi. Onda sanitaizerler ornatylyp, oqýshylar 1 oqýshydan shahmat tártibimen otyrǵyzylǵan. Synypta oqýshylar sany 15-ten aspaýy tiis. Alaida, ata-analar sabaq aiaqtalǵanda mektep qaqpasyna kóptep jinalady jáne tobyr qurady.
Tarazda Qoǵamdyq baqylaý toby qaýipsizdik normalarynyń óreskel buzylǵanyn anyqtady: «Kaspi» banki aldynda adamdar únemi toptasyp turady, maska rejimi buzylǵan, bazar satýshylary men halyq áleýmettik qashyqtyqty saqtamaidy. «Tutas monitoring barysynda oń ózgerister baiqalmady», - dep atap ótti «Qoǵamdyq baqylaý» toby.
Oral men Aqtóbede de áleýmettik qashyqtyqtyń saqtalmaýy jáne maska rejiminiń buzylýy baiqalǵan.
Qostanai oblysy boiynsha Qoǵamdyq baqylaý birqatar máseleni anyqtady: aýdandyq jáne qalalyq aýrýhanalarda qyzmetkerler úshin qolǵaptar, bir ret qoldanylatyn maskalar jetispeidi. Dárigerler kásipkerlerge júginip, solardyń jeke qarajatyna qajetti buiymdardy aldyrǵan. Turǵyn alaptarynda, kóshelerde, shaǵyn saýda oryndarynda jáne kókónis dúkenderinde sanitarlyq normalar buzylýda. Patrýldik qyzmetterdiń belsendiligi aitarlyqtai tómendegen. Úilerdiń birindegi turǵyndar zańsyz qurylys týraly Prezident apparatyna shaǵym jibergen, biraq shaǵym oblysqa qaita jiberildi. Olarmen kezdesýge ókilettilik deńgeii tómen bir ǵana maman jiberilgen. COVID-19-ǵa taldaý nátijelerin berý merzimi áli de keshiktirilýde. Dári-dármekti statsionarlarǵa jetkizýde kedergiler bar, naýqastardyń tegin berilýi tiis dári-dármekti satyp alýy faktileri de kezdesken.
