Qol-aiaǵy saý adamdarǵa qatysty qoldanystaǵy zańnamalyq aktilerdi qaitadan qarap, talabyn kúsheitý qajet. Mundai pikirdi búgin Memleket basshysynyń azamattardy áleýmettik qorǵaý boiynsha bergen tapsyrmalarynyń oryndalýy qaralǵan Úkimet saǵatynda senator Sársenbai Eńsegenov bildirdi, dep habarlaidy QazAqparat tilshisi.
"Degenmen, onyń eki úlken máselesi bar, biri - masyldyq. Shyn máninde sońǵy kezderi osy másele etek alyp bara jatqandai áser qaldyrady. Jaqynda ótken kezdesýde anyqtalǵany - úlken joldyń boiynda salynyp jatqan mektep qurylysyndaǵy jumysshylardyń 90 paiyzdan astamy ózbek memleketiniń azamattary. Qurylys mekemesiniń basshysy sol aýyldyń turǵyny. Ol kisiniń aitýynsha, jergilikti turǵyndar jumysqa kelmeidi. Qara jumysshynyń ailyǵy 90 myń teńge, sylaqshy mamandar 150 myń teńge alady. Mundai aqshaǵa jergilikti turǵyndardyń jumys jasaýǵa yqylasy joq. Keibireýleri "mundai jalaqyǵa jumysqa barsaq, járdemaqydan qaǵylamyz" degen ýáj aitady eken", - dedi ol.
Sondyqtan senator bul úlken máselege ainalyp turǵandyǵyn aita kele qol-aiaǵy saý adamdarǵa qatysty qoldanystaǵy zańnamalyq aktilerdi qaitadan qarap, múmkin talabyn kúsheitken durys shyǵar degen oiyn jetkizdi.
"Al turǵyndar mundai jaǵdaidyń qalyptasýyna bizdiń biznestiń yqylas-nietiniń joqtyǵynan ekenin aitady. Sebebi biznes úshin shetelden kelgen ózbek azamattaryn jumysqa alý tiimdi. Olar kúni-túni jumys jasaidy. Olarǵa artyq jumys jasaǵany úshin tólem jasaýdyń, áleýmettik tólemder tóleýdiń nemese eńbekke jaramsyzdyq tólemin tóleýdiń qajeti joq. Jergilikti turǵyndarmen biznes ókilderi arasynda durys kelisimshart jasalmaidy. "Eńbek zańy negizinen jumys berýshiniń quqyǵyn kózdep ketti, jumysshylardyń quqyǵy shekteýli" degen áńgimeler de aitylýda. Muny bolashaqta zerdelep qarý kerek degen oidamyn", - dedi Sársenbai Eńsegenov.
