Qaraǵandyda qoǵam belsendisi Ǵaly Baqtybaevtyń ólimine aiyptylarǵa sot úkimi shyqty. Alqabiler úsh kúdiktiniń barlyǵyn aqtaý úshin daýys berdi, dep habarlaidy "Ult aqparat".
Ǵaly Baqtybaevtyń qazasyna qatysty rezonansty is Qaraǵandy oblysynyń qylmystyq ister jónindegi mamandandyrylǵan aýdanaralyq sotynda alqabilerdiń qatysýymen qaraldy. Is boiynsha tóraǵalyq etýshi sýdia bolyp Qairat Qasymov taǵaiyndaldy.
Prokýror kúdiktiler Azamat Bókenaev pen Ǵalym Ahmedjanovqa jazasyn qaýipsizdigi eń joǵary mekemede óteýmen, 20 jylǵa bas bostandyǵynan aiyrýdy surady. Al Iman Miiashovti aiyptaý baptarynyń jiyntyǵyn jáne burynǵy quqyq buzýshylyqtaryn eskere otyryp, jazasyn qaýipsizdigi tótenshe mekemede óteýmen 25 jylǵa túrmege qamaý usynyldy.
Bastapqyda úkimniń jariialanýy 28 mamyr, jumaǵa belgilengen bolatyn. Alaida sýdia sheshimdi úsh kúnge shegerdi. Biraq 31 mamyrda alqabilerdiń biriniń syrqatyna bailanysty úkimdi jariialaý 1 maýsymǵa aýystyryldy. Búgin sot úkimi shyǵaryldy.
Azamat Bókenaev, Ǵalym Ahmetjanov jáne Iman Miiashov Ǵaly Baqtybaevtyń ólimine kinásiz dep tanyldy. 12 alqabidiń 10-y aqtaý úkimi úshin daýys berdi.
«Daýys berý qorytyndysy boiynsha Baqtybaevty óltirýdi uiymdastyrǵany jáne jasaǵany úshin aiyptalǵan Azamat Bókenaev, Ǵalym Ahmedjanov, Iman Miiashovqa qatysty aqtaý úkimine 10 alqabi daýys berdi. Alqabilerdiń úkimi negizinde A.Bókenaev, Ǵ.Ahmedjanov qylmystyq quqyq buzýshylyqtardy jasaýǵa sottalýshylardyń qatysy bary dáleldenbegeni úshin aqtaldy», - dedi sottyń baspasóz qyzmetinen.
Alqabiler Iman Miiashovty aiyptaýdyń negizgi baby boiynsha aqtasa da, ol Baqtybaevtyń densaýlyǵyna ortasha dárejede ziian keltirgeni úshin kináli dep tanylyp, 5 jylǵa bas bostandyǵynan aiyryldy.
Esterińizge sala keteiik, Ǵaly Baqtybaevty 2019 jyldyń 28 mamyrynda óz úiiniń tabaldyryǵynda óltirip ketken. Tergeý málimetteri boiynsha, kisi óltirýge tapsyrys berýshiler Atasý kentiniń turǵyndary – biznesmen Azamat Bókenaev jáne burynǵy politsei Ǵalym Ahmedjanov bolǵan. Ekeýi bir million teńgege killer jaldap, ony qarý-jaraqpen qamtamasyz etken. 28 jyldyń 2019 mamyrynda óltirýshi buiryqty oryndap, oqiǵa ornynan qashyp ketti.
