Aqmola oblysyna qarasty Ereimentaý aýdanynda ornalasqan Kóbeituz kóli sýynda ýyttylyǵy joǵary himiialyq zattardyń joǵary shoǵyrlanýy anyqtaldy, dep habarlaidy "Ult aqparat".
QR Ekologiia, geologiia jáne tabiǵi resýrstar ministrliginiń málimetinshe, «Qazgidromet» RMK mamandary Kóbeituz kóline jospardan tys shyǵyp, kóldegi sýdyń, túp shógindilerdiń jáne jaǵalaýdaǵy topyraqtyń synamalaryn aldy. Kóbeituz kóli sýynyń sapasyn taldaý 42 fizika-himiialyq kórsetkishter boiynsha júrgizildi. Túp shógindilerde kadmii, marganets, mys, kúshála, nikel, qorǵasyn, hrom mólsheri tabyldy. Jaǵalaýdaǵy topyraqta kadmii, mys, myrysh, qorǵasyn, hrom bar ekendigi belgili boldy. Al jer ústi sýlarynyń synamalarynda ýytty, ýyttylyǵy joǵary elementter men metaldardyń joǵary shoǵyrlanýy - kúshála (20,7 mg/dm3), qorǵasyn (73,8 mg/dm3), kadmii (0,19 mg/dm3), myrysh (15,7 mg/dm3), hrom (2,3 mg/dm3), mys (1,4 mg/dm3), nikel (0,4 mg/dm3), molibden (6,2 mg/dm3) anyqtaldy.
«Makro-mikroelementterdiń jer ústi sýlaryna túsýiniń yqtimal kózi - jer asty topyraqtarynan shaiylýy. Ereimentaý aýdanynyń jer qoinaýy altyn, súrme, tas kómir, boksit, granit, áktas jáne basqa da qorlarǵa bai. Sýdyń, túp shógindilerdiń, jaǵalaýdaǵy topyraqtyń fizika-himiialyq kórsetkishteriniń naqty shoǵyrlanýy boiynsha nátijeler QR EGTRM Ekologiialyq retteý jáne baqylaý komitetine jiberildi. Kóbeituz kólinde ýyttylyǵy joǵary himiialyq zattardyń joǵary shoǵyrlanýynyń bolýyn eskere otyryp, Kóbeituz sý aidynynyń halyq úshin qaýipsizdigin belgileý úshin densaýlyq saqtaý salasyndaǵy ýákiletti memlekettik organdy tarta otyryp, arnaiy zertteýler júrgizý qajet dep sanaimyz», - delingen taratylǵan aqparatta.
Eske sala ketsek, buǵan deiin Ekologiia, geologiia jáne tabiǵi resýrstar ministrligi Kóbeituzdyń lastanyp, ol jaqtan tuzdyń tielip áketilýine bailanysty alańdaýshylyq bildirgen edi. Oǵan halyqtyń kólge kóptep kelip, tuzyn qazyp, mańaiyn qaldyqqa toltyryp ketýi sebep. Tipti áleýmettik jelide Kóbeituzdyń tuzyn kelisin bes myń teńgege satqandar da paida boldy.
Aita keteiik, elordadan 170 shaqyrym jerde ornalasqan Kóbeituz kóline karantin bitkenshe barýǵa tyiym salynǵan.
