Qazaqstan musylmandary dini basqarmasynyń tóraǵasy, Bas múfti Naýryzbai qajy Taǵanuly QMDB tasqynnan zardap shekken ońtústiktegi halyqqa kómek kórsetiletinin málim etti, dep habarlaidy QazAqparat.
«Biyl qasietti Ramazan aiynyń karantin jaǵdaiynda ótip jatqanyn ózderińiz kórip otyrsyzdar. Bul jaǵdai saýapty amaldar men igi sharalarǵa kedergi keltirmedi. Meshit tarapynan 100 myńǵa jýyq kómekke muqtaj otbasyǵa qaiyrymdylyq jasaldy. Aýyzashar asy áli kúnge deiin tegin taratylýda. Saýaptar eselenip jazylatyn berekeli aida igi iske atsalysqan barsha azamatqa airyqsha alǵysymdy bildiremin. Alla razy bolsyn!» - dedi Bas múfti OKQ-da ótken baspasóz máslihatynda.
Naýryzbai qajy Taǵanuly «Qaiyrymdylyq jasasań – qaiyryn óziń kóresiń» dep halqymyz aitqandai, igi amaldyń saýaby eselinýin tiledi.
«Biz osynaý igi jumystarmen shektelmei, Maqtaaral aýdanyndaǵy jerlesterimizge ár oblystaǵy meshitterdiń qoldaýymen azyq-túlik tielgen júk kólikterin jiberdik. Qarjylai da qoldaý kórsettik. Biz búgin «Zeket» qorynyń uiymdastyrýymen, oblystaǵy meshitterdiń atsalysýymen 10 million teńge qarjylai kómekti «Túrkistan korporativtik áleýmettik damý qoryna» aýdardyq. Sonymen qatar 30 tonna un jetkizetin bolamyz. Alla qalasa, 18 mamyrda Maqtaaral aýdanyndaǵy baspanaǵa asa zárý eki otbasyǵa eki úidiń kiltin tabystaimyz. «Zeket» qorynyń «El úlesi – páterge» jobasy aiasynda júzege asatyn qaiyrymdylyq sharasyna, Alla buiyrsa ózim de qatysamyn. Sondai-aq Tólebi aýdanyndaǵy tasqyn sýdan zardap shekken jerlesterimizge de qaiyrymdylyq kómek berýdi josparlap qoidyq», - dedi ol.
Bas múfti tótenshe jaǵdai kezinde Qazaqstan musylmandary dini basqarmasynyń qabyldaǵan sheshimine túsinistik tanytyp, orazany oqshaý túrde ótkizip, úide qulshylyq etip jatqan barshańyzǵa óz atymnan taǵy da alǵysyn jetkizdi.
