Qazaqstan musylmandary dini basqarmasy mekteptegi qyzdardyń oramal taǵý máselesine qatysty óz ustanymyn bildirdi, dep habarlaidy Ult aqparat.
"QMDB jamaǵat tarapynan kiim máselesine qatysty joldanǵan suraqtarǵa shariǵat boiynsha, baliǵat jasyna tolǵan musylman qyzǵa oramal taǵý mindet ekenin málimdeidi. Qazaqstan musylmandary dini basqarmasy elimizdegi musylman qyz-kelinshekter men áielderdi kiim kiiý úlgisinde qazaq halqynyń salt-dástúrlerin saqtai otyryp, jinaqy kiinýge keńes beredi. Al paranja (niqab) kiiýdiń saltymyzda bolmaǵan, basqa eldiń úlgisi ekenin de erekshe atap ótkenimiz jón.
Islam shariǵatynda qyz balanyń baliǵatqa tolýyn 9 jaspen shekteý durys emes. Musylman ǵalymdary qyz balalardyń fiziologiialyq erekshelikterine sai, kópshiliktiń jaǵdaiyn nazarǵa ala otyryp, 15 jaspen shektegen.
Islam dini baliǵat jasyna tolmaǵan, sanasy tolyq qalyptasyp úlgermegen, oramal taǵýdyń túpki máni men mańyzyn, úkimin túsinbeitin kishkentai qyz balasyna oramal taǵýdy mindettemeidi. Árbir musylman qyz bala oramaldyń qadir-qasietin tereń túsinip, jaýapkershiligin sanaly túrde sezinip, Allanyń ámirin óz erkimen oryndaýy basty maqsat. Mektep tabaldyryǵyn endi ǵana attaǵan búldirshindi jaýlyq jabýǵa májbúrleýden buryn oǵan eń áýeli bilim men tárbie bergen abzal. Bul – ata-ananyń basty mindeti.
Alla Taǵala kúlli adamzat balasyna imandy bolýdy ári bilim alýdy ámir etken. Quran Kárimniń eń alǵash túsken aiatynyń ózi «Oqy!», degen buiryqpen bastalýy erekshe nazar aýdararlyq.
Sondai-aq Quranda: «Rabbym, bilimimdi arttyr!», («Taha» súresi, 114), «Biletinder men bilmeitinder birdei bola ma?» («Zýmar» súresi, 9), «Alla Taǵala senderdiń aralaryńda iman keltirgender men boilaryna bilim darytqandardyń dárejelerin ósiredi» («Mýjádálá» súresi, 11) dep ilim ieleriniń mártebesiniń joǵarylyǵyn atap ótken.
Ardaqty Paiǵambarymyz (Allanyń salaýaty men sálemi bolǵai): «Bilim alý árbir musylman er kisige de, áielge de paryz»,– dep bilim izdenýdiń áielderge de tiisti ekenin aitqan.
Sondyqtan da, dinimizde musylman er kisi men áielge bilim alý – mindet. Al mektep jasyndaǵy balaǵa imandylyqqa baýlyp, bilim úiretý – árbir adamnyń azamattyq ári musylmandyq boryshy. Dini hám zaiyrly bilim alý – jarqyn bolashaqtyń kilti.
Búgingi zamannyń úderisi elimizdiń árbir azamaty men laýazymdy tulǵasyna bilimdi, imandy, otanshyl urpaq qalyptastyrýdy talap etýde. Bul – barshamyzdyń uly boryshymyz, asyl mindetimiz.
Biz musylman jamaǵaty men ata-analardy oqý oryndarynyń mektep oqýshylarynyń kiim úlgisine qatysty qoiylatyn talaptaryna túsinistikpen jáne sabyrlyqpen qaraýǵa shaqyramyz. Bul máseleni ýshyqtyrý durys emes. Óitkeni elimizde oramalǵa túbegeili tyiym salynbaǵanyn túsinýimiz kerek. Tek orta mektepterde kiim úlgisin birizdilikke túsirý maqsatynda sheshim qabyldanǵan.
Konstitýtsiiaǵa sáikes, elimiz zaiyrly memleket bolyp tabylady, onda azamattardyń ar-ojdan bostandyǵyna erkindik berilgen. Sonymen qatar, «Dini qyzmet jáne dini birlestikter týraly» Zańda dini birlestikterdiń memlekettiń qyzmetine aralaspaityny kórsetilgen. Atalǵan Zańda elimizdegi bilim berý jáne tárbieleý júiesi din men dini birlestikterden bólingendigi jáne zaiyrly sipatta bolatyndyǵy aitylǵan.
Dindar azamattar qoǵamnan bólek ómir súrmeidi. Dinimizdegi boiusyný – negizgi mindetterdiń biri. Sondyqtan musylmandar zańǵa qurmetpen qaraýy tiis.
Elimizdiń zańnamalary bizge balalarymyzdyń orta bilim alýyn qamtamasyz etýimizdi mindetteidi. Bilimsizdik búlikke bastaitynyn umytpaiyq. Sondyqtan qyz balanyń tolyqqandy zaiyrly bilim alýyn ata-analary elimizdiń zańnamasy talaptary sheńberinde qamtamasyz etkenderi jón.
Alla Taǵaladan elimizdi túrli búlikten saqtaýyn tileimiz. Halqymyzdyń birligi men berekesi arta bergei!" - delingen basqarma málimdemesinde.
