Qazaqstan musylmandary dini basqarmasynyń (QMDB) qoǵam aldyndaǵy negizgi 4 qyzmetiniń biri – qaiyrymdylyq sharalaryn uiymdastyrý, dep habarlaidy "Ult aqparat" QMDB-nyń resmi saityna silteme jasap.
QMDB kómekke muqtaj jandardy qoldaý, qaýipti indettiń aldyn alý maqsatynda WWW.QURBAN2020.KZ saityn iske qosqan bolatyn.
Jobanyń maqsaty – qaiyrymdylyqqa dáneker bolý, halyqtyń densaýlyǵy men ómirine tóngen qaýipti seiiltýge úles qosý, qurban shalýǵa niet bildirgen jandarǵa karantin jaǵdaiynda ońtaily jol usyný, t.b.
«Qurmetti qaýym!
WWW.QURBAN2020.KZ jobasy boiynsha júieli esep berip turatynymyz jaily osyǵan deiin ózderińizge habarlaǵanymyzdai, 2020 jyldyń 31 shildesi saǵat 15:00-degi málimet boiynsha respýblika deńgeiinde 3225 adam qurbandyq shalýǵa tapsyrys berdi. Budan bólek 1000-nan astam adam Alla razylyǵy úshin qosymsha qurbandyq malyn ákelip tapsyrdy. Búgin, iaǵni Qurban aittyń birinshi kúninde elimiz boiynsha 4 700 mal shalyndy. Onyń ishinde qoi – 4341, iri qara – 274, eshki – 83, túie – 2. Buǵan qosa 22 kásiporyn men mekemeler qurbandyq malyn tapsyrdy. Barlyq málimetti jinaqtap aitqanda, elimiz boiynsha 17 997 otbasyǵa qurbandyq eti taratyldy.
Qadirli otandastar!
Halqymyzda: «Qaiyrymdylyq jasasań, qaiyryn óziń kóresiń» degen naqyl sóz bar. Barshańyz shynaiy nietpen qurban shalyp, muqtaj otbasylarǵa merekelik qýanysh syilap, saýapty iske ortaqtasyp otyrsyzdar.
Asa Qamqor, Erekshe Keńshilik Iesi bolǵan Alla Taǵala osy amaldaryńyzdyń saýabyn arttyryp, óz quzyretinde qabyldyqqa jazǵai. Saýaby mol qaiyrymdylyq istiń jaqsylyǵy ózderińizge eselep qaityp, halyqtyń alǵysy men batasyna bólene berińizder. Kómek alǵan jandardyń sizderge joldaǵan duǵa-tilekteri qabyl bolǵai. Jaratqan Jabbar Iemiz mereilerińizdi ústem etip, eki dúnieniń nyǵmeti men qurmetine bólenýdi násip etkei. Ámin!»,-delingen habarlamada.
