Qazaqstan musylmandary dini basqarmasy koronavirýsqa qarsy ekpe salýǵa qatysty málimdeme jasady, dep habarlaidy "Ult aqparat" muftyat.kz-ke silteme jasap.
QMDB málimdeýinshe, Islam dininde adamnyń ómiri men densaýlyǵynan asqan qundylyq joq. Sondyqtan árbir adam óz densaýlyǵyna asa mán berýi qajet.
«Alla Taǵala «Baqara» súresiniń 195-aiatynda: «Ózderińdi óz qoldaryńmen qaýip-qaterge salmańdar», – dep buiyrǵan.
Alla Elshisi (oǵan Allanyń salaýaty men sálemi bolsyn): «Emdelińder, rasynda Alla árbir dertti shipasymen qosa jaratty», – degen.
Dana halqymyz: «Aýyryp em izdegenshe, aýyrmaityn jol izde», – dep shipa izdeýge úndegen. Sol úshin kez kelgen adam emdelýdiń jáne aýrýdyń aldyn alý joldaryn qarastyrýy tiis.
Arnaiy meditsina mamandary qazirgi tańda álemge qaýip tóndirgen koronavirýs indetiniń aldyn alý úshin vaktsinatsiialaýdyń adam densaýlyǵyn saqtap qalýdyń qaýipsiz jáne tiimdi ádis ekenin aitýda. Al shariǵat boiynsha zárý jaǵdaida ekpe salýǵa bolady. Alaida ekpe saldyrý – ár azamattyń óz erki», - delingen málimdemede.
QMDB málimdeýinshe, álemde jáne elimizde pandemiialyq jaǵdai kún saiyn kúrdelenýde.
«Juqpaly dertten bir otbasynda birneshe adam jan tapsyrýda. Bul jaǵdai ekpe saldyrýǵa qatysty oń sheshim qabyldaý qajettigin kórsetip otyr. Osy rette halyqty barynsha saqtanyp, densaýlyǵymyz ben ómirimizdi saqtap qalý úshin ekpe saldyrýǵa úndeimiz.
Alla Taǵala halqymyzdy juqpaly indetten saqtap, naýqas jandarǵa shipa násip etsin! Ámin!», delingen úndeýde.
