Qazaqstan musylmandary dini basqarmasy Shariǵat jáne pátýa bólimi qaýipti juqpaly aýrýlardan qaitys bolǵandardy jerleý týraly pátýa shyǵardy, dep habarlaidy "Ult aqparat".
«Shariǵat boiynsha qaitys bolǵan musylmandy jýyndyrý, kebindeý, oǵan janaza namazyn oqý jáne ony jerleý – paryz kifaia. Paryz kifaia degenimiz – keibir musylmandar oryndaǵan jaǵdaida ózgelerge mindet bolmaityn amal» delingen QMDB málimdemesinde.
Qazaqstan musylmandary dini basqarmasynyń Ǵulamalar keńesi óte qaýipti juqpaly (týliaremiia, ebola, koronavirýs, oba, t.b.) aýrýlardan qaitys bolǵan adamdardyń máiitterin jýyndyrýǵa jáne jerleýge qatysty tómendegi sharalardy júzege asyrýdy maquldaidy:
Birinshiden, máiitti jýyndyrý. Óte qaýipti juqpaly dertten qaitys bolǵan adamdy jýyndyrý rásimi arnaiy memlekettik mekemeniń sanitariialyq-epidemiologiialyq talaptaryna sáikes júzege asýy tiis. Máiithanada (morg) jýyndyrý sharasy shariǵat talabyna qaishy kelmese, máiitti qaita jýyndyrý shart emes. Qaitys bolǵan er kisini er kisi, áieldi áiel jýyndyrýy kerek.
Ekinshiden, máiitti kebindeý. Shariǵat boiynsha máiit kebindelýi mindet. Er kisi úsh qabat matamen, al áiel bes qabat matamen kebindeledi. Alaida juqpaly dertten qaitqan kisini kebindeý isinde sanitarlyq qaǵidalar saqtalýy tiis. Eger máiithanada kebindelgen máiit shariǵatqa sai bolsa, qaita kebindeý shart emes. Qaitys bolǵan er kisini er kisi, áieldi áiel kebindeýi qajet.
Úshinshiden, janaza namazyn oqý. Qaýipti indetke bailanysty jariialanǵan tótenshe jaǵdaida janaza namazyna marqumnyń eń jaqyn týystarynyń qatysýy jetkilikti. Saqtyq sharalary úshin adam sanyn barynsha azaitý qajet. Qalalyq jaǵdaida indettiń qoǵamdyq ortaǵa (mysaly, kópqabatty úi turǵyndaryna, kórshilerine, t.b.) taralmaýy úshin marqumdy máiithanadan tikelei zirat basyna aparyp, sol jerde janaza namazyn oqyp, jerleýge shariǵatymyzda ruqsat etilgen. Janaza rásimderin jergilikti imam atqarady. Namaz oqyǵan kezde sanitarlyq normaǵa sai máiit imam men jamaǵattan qashyq jerge qoiylady.
Tórtinshiden, máiitti jerleý. Máiit ziratqa arnaiy kólikpen jetkizilýi tiis. Máiitti jerleý rásiminde bioqaýipsizdik sharalary qatań saqtalýy tiis. Sondai-aq máiit qaitys bolǵan mekeninde jerlenýi tiis. Sanitariialyq-epidemiologiialyq mekemesiniń ruqsatynsyz máiitti úiine nemese basqa meken-jaiǵa (ózge qalaǵa, týǵan jerine) aparmaǵan durys. Mundaǵy maqsat – juqpaly indettiń ózge aimaqtarǵa taralýynyń aldyn alý.
Eskertý: Sanitariialyq-epidemiologiialyq mekemesi tarapynan máiitti shariǵat jolymen jýyndyrýǵa, taiammým aldyrýǵa jáne kebindeýge ruqsat berilmese, mundai jaǵdaida shariǵattyń zárýlik úkimi negizge alynady. Máiithanada oralǵan mata, arnaiy úldir (klionka) nemese tabyt ashylmastan, sol hálinde janaza namazy máiitten alys turyp oqylady.
