QR DSM Qoǵamdyq densaýlyq saqtaý komiteti Shymkent qalasynda klizmadan kúiip qalǵan balaǵa qatysty táýelsiz sarapshylardyń qatysýymen jospardan tys tekserý júrgizdi, dep habarlaidy "Ult aqparat" komitettiń baspasóz qyzmetine silteme jasap.
«Jospardan tys tekseris barysynda mynadai kemshilikter anyqtaldy: tiisti ruqsaty joq infektsionist-dáriger klinikalyq qyzmet kórsetken, protsedýrany tájiribesiz medbike jasaǵandyqtan, klizma jasaý tártibi buzylǵan. Al aýrýhananyń jaýapty qyzmetkerleri meditsinalyq protsedýranyń durys atqarylýyn qadaǵalamaǵan. Atalǵan fakti boiynsha 2 medbike jumystan shyǵaryldy, bas medbike qyzmetinen alyndy, bas dárigerdiń orynbasary men emdeýshi dárigerge qatań sógis jariialandy» delingen habarlamada.
Budan bólek, Shymkenttegi qalalyq infektsiialyq aýrýhananyń bas dárigerine ákimshilik jaza retinde 45 AEK kóleminde aiyppul salyndy. Sondai-aq, tekseristiń qorytyndysy boiynsha materialdar protsessýaldyq sheshim shyǵarý úshin quqyq qorǵaý organdaryna jiberiledi.
«Búginde 10 ailyq náreste sanitarlyq aviatsiia kómegimen Almaty qalasyndaǵy Pediatriia jáne balalar hirýrgiiasy ǵylymi ortalyǵyna jetkizilgen. Qazir balanyń jaǵdaiy aýyr emes, turaqty. Oń jaq jambasy men tikisheginiń kúigeni anyqtaldy. Balaǵa rektoskopiia jasaý kezinde tikishektiń shyryshty qabatynyń kúigeni baiqalady. Biraq, qansyraý men nekroz belgileri joq. Tikishektiń basqa bóligi ózgermegen. Bala konservativti em qabyldaýda. Mamandardyń aitýynsha, naýqastyń eminde oń nátije baiqalady» dep málim etti komitetten.
Eske sala keteiik, oqiǵa 28 naýryz kúni bolǵan. Aýrýhana medbikesi klizma jasaý kezinde sýdyń temperatýrasyn teksermegen. Ol temperatýra 36 gradýs bolý kerek bolsa, balaǵa 50-60 gradýs ystyq sýmen jasalǵan. Saldarynan balany termiialyq kúiik shalǵan. On ailyq sábidiń kúiip qalýyna sebepker bolǵan 2 medbike men aǵa medbike tergeý aiaqtalǵanǵa deiin jumystan shettetildi.
Sondai-aq, densaýlyq saqtaý ministri Eljan Birtanov atalǵan jaǵdaiǵa qatysty pikir bildirdi. Aita keteiik, búginde balanyń jaǵdaiy densaýlyq saqtaý ministrliginiń udaiy baqylaýynda.
