Klimattyń ózgerýi sý jáne azyq-túlik qaýipsizdigimizge qaýip tóndiredi. Bul týraly QR Ekologiia, geologiia jáne tabiǵi resýrstar ministri Maǵzum Myrzaǵaliev «ECOJER» halyqaralyq kongresinde aitty, dep habarlaidy QazAqparat.
«Respýblikamyz Táýelsizdiginiń 30 jyldyǵyn merekeleý aiasynda ótip jatqan «Bolashaqtyń baǵdary – turaqtylyq» halyqaralyq kongresinde sizderdi Qazaqstan Respýblikasy Ekologiia, geologiia jáne tabiǵi resýrstar ministrliginiń atynan quttyqtaýǵa ruqsat etińizder. Aita keterligi, bul is-shara Dúniejúzilik qorshaǵan orta kúni qarsańynda ótkizilip jatyr. Qazirgi ýaqytta turaqty damý máseleleri álemdik kún tártibiniń mańyzdy bóligi bolýda. Biz klimattyń qalai ystyq bolyp jatqanyn, sýdyń azaia bastaǵanyn jáne muzdyqtardyń shegingenin baiqaimyz. Klimattyń ózgerýi bizdiń sý jáne azyq-túlik qaýipsizdigimizge qaýip tóndiredi», - dedi ministr.
Onyń atap ótýinshe, Qazaqstannyń gúldenýi men ál-aýqaty osyǵan bailanysty ekenin túsine otyryp, el basshylyǵy klimattyń ózgerýi máselelerine erekshe nazar aýdarýda.
«Tuńǵysh Prezident - Elbasy Nursultan Nazarbaev pen Memleket basshysy Qasym-Jomart Toqaev túrli halyqaralyq alańdarda klimat máselelerin birneshe ret kóterdi. Sonyń bir mysaly – «Jasyl kópir» seriktestik baǵdarlamasy, «jasyl» ekonomika boiynsha tujyrymdamany qabyldaý, Parij kelisimin ratifikatsiialaý jáne taǵy basqalar», - dedi Maǵzum Myrzaǵaliev.
