Foto: parlam.kz
Premer-Ministrdiń birinshi orynbasary Roman Skliarǵa depýtattyq saýal joldaǵan májilismen Erlan Sairov qysy-jazy saiajaida turatyn adamdardy arnaiy esepke alýdy usyndy, dep habarlaidy Kazinform agenttigi.
«Úkimet «Tarifke investitsiia aiyrbas» printsipin iske asyrǵanda halyqtyń qaltasy jutań ekenin eskerýge tiis. Turǵyn úi kómegi toqsan saiyn tólenedi. Árbir toqsanǵa ortasha eseppen 20 myń teńge. Onyń ózin naǵyz muqtaj adamdar ala almaidy. Óitkeni bul ótemdi alý úshin menshik úiiń nemese memleketten jalǵa alǵan úiiń bolý kerek. Onyń ózinde ondaǵan qujat toltyrý qajet. Eń bastysy, úi-kúii joq, páter jaldap júrgen ondaǵan myń naǵyz muqtaj azamatqa memleket kómeginiń jurnaǵy da timeidi. Olar memlekettiń esebinde múldem joq. Tarifterdiń ósýinen qinalatyn, ótemaqyǵa zárý osy kisiler. Klebanov tárizdilerdiń biznesi júrmei qalady dep sińir kedeilerdi qanai berý kúpirlik bolady», - dedi depýtat.
Onyń paiymynsha, Úkimet «Tarifke investitsiia aiyrbas» reformasy kezinde myna máselelerge nazar aýdarý kerek.
«Tarifterdiń qymbattaýyna bailanysty tólemaqynyń somasyn arttyrý qajet. Bul tólemaqyny naǵyz muqtaj, qalada óziniń baspanasy joq, páter jaldap turatyn azamattardyń alýyna normativtik tetikter jasaý kerek. Baspanasy joq, páter jaldap júrgen azamattardy statistika málimetterine engizip, olardyń áleýmettik jaǵdaiyna monitoring jasaityn ádisteme engizý qajet. Búginde páter jaldap, saiajaida turyp jatqan azamattarǵa memlekettik áleýmettik kepildeme alatyn júie jasaý kerek. Olar – bizdiń azamattarymyz. Bul azamattar bir de bir statistika málimetterine tirkelmegen. Iaǵni, ol adamdar memlekettiń esebinde múldem joq. Olarǵa nazar aýdarmaý erteń áleýmettik, saiasi táýekelge ákelýi yqtimal», - dedi Erlan Sairov.
