Memleket basshysynyń atyna ulttyq merekemiz - Qazaqstan Respýblikasynyń Táýelsizdik kúnine orai hattar men jedelhattar kelip tústi, dep habarlaidy Aqordanyń baspasóz qyzmeti.
Nursultan Nazarbaevtyń atyna Qazaqstan Respýblikasynyń Táýelsizdik kúnine orai quttyqtaý jedelhattary men hattar kelip túsýde.
Qytai Halyq Respýblikasynyń Tóraǵasy Si Tszinpin jeke óziniń jáne Qytai halqynyń atynan Memleket basshysyn jáne barsha qazaqstandyqtardy Táýelsizdiktiń 27 jyldyǵymen quttyqtady. Si Tszinpin Nursultan Nazarbaevtyń basshylyq etýimen Qazaqstannyń qol jetkizgen áleýmettik-ekonomikalyq damý nátijelerin erekshe atap ótti.
«Men Qazaqstan men Qytai qarym-qatynastarynyń damýyna basa mán berip, Sizben jumys babyndaǵy bailanysymyzdy jáne jeke dostyǵymyzdy joǵary baǵalaimyn. Biylǵy maýsym aiynda Siz Qytaiǵa memlekettik saparmen kelip, Shanhai yntymaqtastyq uiymynyń Tsindaodaǵy sammitine qatystyńyz. Biz jemisti kezdesý ótkizip, birqatar mańyzdy ýaǵdalastyqtarǵa qol jetkizdik. Bul eki jaqty qatynastardyń damýyna tyń serpin berdi.
Men Sizben birlese otyryp, memleketterimiz ben halyqtarymyzdyń igiligi jolynda jańa belesterdi baǵyndyrýǵa jáne eki el arasyndaǵy jan-jaqty strategiialyq seriktestik bailanystardy ilgeriletýge ázirmin. Sizben «Bir beldeý, bil jol» halyqaralyq yntymaqtastyǵynyń joǵary deńgeidegi ekinshi forýmy barysynda júzdesemiz dep oilaimyn», - dep atap ótken Si Tszinpin.
Sondai-aq, Qytai basshysy dostas Qazaqstannyń ósip-órkendei berýine niettestik bildirip, al halqyna baq-bereke tiledi.
