Búgin elordalyq «Barys» qurlyqtyq hokkei ligayndaǵy kezekti oiynynda Reseidiń «Salavat Iýlaev» (Ýfa) komandasyn qabyldady, dep habarlaidy "Ult aqparat".
Aita ketý kerek, qurlyqtyq hokkei ligasynyń turaqty kezeńi máresine jaqyndap keledi. Endi elordalyq klýbtyń alda eki oiyny qaldy. Sondyqtan búgingi kezdesý «Barystyń» elordadaǵy biylǵy sońǵy oiyny bolmaq.
«Salavat Iýlaev» ta osal qarsylas emes. Ýfalyq klýb 59 oiynnan keiin 66 upai jinap, qazir týrnir kestesinde on ekinshi orynda tur. Al «Barys» 59 oiynnan keiin 79 upai jinap, altynshy orynda keledi. Komandalar plei-off kezeńine beriletin joldamaǵa qol jetkizip úlgerdi.
Búgingi kezdesýde reseilik komanda alǵash bolyp esep ashty. Aldymen Artiom Sergeev 6-minýtta «Salavat Iýlaevty» alǵa shyǵardy. Birinshi kezeńde ýfalyq komanda «Barysqa» tarazy basyn teńestirýge eshqandai múmkindik bergen joq.
Esesine ekinshi kezeńde qazaqstandyq hokkeishiler qarsylas komanda qaqpashysyn qapy qaldyryp ketti. Oiynnyń 28-minýtynda Nikita Mihailis «Salavat Iýlaev» qaqpasynan sańylaý tapty.
Úshinshi kezeńde Kiortis Valk 45-minýtta «Barys» komandasyn alǵa shyǵardy. Budan keiin qos komandanyń da esepti ózgertetin múmkindigi bolǵan edi. Búgingi kezdesýde elordalyq klýb qarsylasynan 2:1 esebimen basym tústi.
Budan buryn «Barys» elordada «Sibir» klýbynan overtaimda 1:2 esebimen jeńilip qalǵan edi.
«Barys» endi syrt aidynda eki oiyn ótkizedi. Aldymen 24 aqpanda Reseidiń «Admiral» (Vladivostok), 26 aqpanda «Amýr» (Habarovsk) komandalarymen kezdesedi. Sodan soń qurlyqtyq hokkei ligasy turaqty kezeńi aiaqtalyp, plei-off satysy bastalady.
